كۆنێ رەش د ڤان رۆژێن داویدا مامۆستە مستەفا جزیری پرتووكەك خوە ئا نوو ب ناڤێ (سەگڤانێ خوركی) بۆ من شاندیە. ئەڤ پرتووك ژ رەخ ئەنستیتویا كوردی ئا ستۆجھۆلمێ د سالا 2011ئێدا ھاتیە چاپ و بەلاڤ كرن. پشتی كو من خوەند، ئەو رۆژێن من یێن زارۆكتیێ ھاتن بیرا من، دەما كو زڤستانێن سار و ب باران ب سەر مە دە دھاتن، مە خوە ل بەر ئاگرێ تفكێ و سۆپا تەپكا گەرم دكر و د بەر رە ل چیرۆك و چیڤانۆكێن بەریا مێردینێ گوھداری دكر. ئەرێ خوەندنا ڤێ چیرۆكێ ئەو رۆژێن زارۆكتیێ ئانین بیرا من. ب راستی مستەفا جزیری، ئەڤ چیرۆك ژ ناڤ دلێ چیرۆكێن بەریا مێردیمێ بژارتیە، نەساخم كو باژارێ ئاموودێ، مێردینێ و بەریا مێردینێ ناڤەندن ژ بوویەرێن وێ رە.. وی، ب زمانەكێ سادە كوردی و رەوان بەرھەڤ كریە. لێ مخابن گەلەك شاشیێن چاپێ د ناڤ رە دەرباس دبن. دەما كو مرۆڤ دەست ب خوەندنا وێ بكە، نكارە خوە ب داوی ڤە نەگھینە. ئەڤ چیرۆك خوەش نشانە ژ كەڤنبوون و دێرانیا باژارێ ئاموودێ رە. مامۆستە ئامەد تیگریس د پێشگۆتنا ڤێ پرتووكێدە وھا نڤیساندیە: بوویەر و چیرۆكا (سەگڤانێ خوركی)، ل ھەرێما مێردینێ دەرباس دبە كو وێ دەمێ باژارێ ئاموودێ ژی ل سەر مێردینێ بوویە. ل گۆر دەما خوە رەوشا جڤاكا وێ ھەرێمێ، چاندا وێ ھەرێمێ، ھەلوەست و كرنێن داگیركەر و زالمێن وێ دەمێ ددە خویاكرن. ئەڤ چیرۆك مێرانی، زۆردەستی، بێبەختی، بەخت و تەختی ب ئاوایەكی زەلال و ڤەكری رادخە بەر چاڤان. مامۆستە مستەفا جزیری د سالا 1959 ل قامشلۆ ھاتیە دنیایێ، دبستانا سەرەتایی ل گوندێ ھەرێما ئۆمەریان (كوركا چەتۆ)، خوەندیە، لیسە ل نەسێبین و دیاربەكرێ خوەندیە. د جوانیا خوەدا كەتیە ناڤ رەفێن ئازادیخوازێن كوردستانێدا و گەلەك جاران ژ بەر خەباتێن خوە یێن پۆلیتیكی ھاتیە گرتن. د سالا 1981ئێدا ژ بەر سەدەمێن سیاسی دەركەتیە دەرڤی وەلات و ل سوێد بوویە پەنابەرەكی سیاسی. ل باژارێ ستۆكھۆلمێ ب سالان مامۆستەتیا زمانێ كوردی كریە. ب خەباتێن سیاسی رە خەباتێن چاندی ژی مەشاندیە. ژ دەری ڤێ بەرھەمێ گەلەك نڤیسێن وی د كۆڤارا و مالپەراندا دەركەتنە و ژ سوێدی (نێچیرا رۆڤی و مێرگا ژێری) وەرگەراندیە كوردی. ئەز ژ دل سپاسیا كەك مستەفا دكم و ژێ ب ھێڤی مە كو ڤێ زمانێ خوە یێ خوەش و ھێسان د گەلەك كارێن وھادا بكار بینە. ژ لاتینی: كانی رۆیار