2012-03-18

دوای تەواوبوونی كۆبوونەوەی نێوانیان كە ئه‌مڕۆ لەبارەگای مەكتەبی سیاسیی كۆمەڵی ئیسلامی بەڕێوەچوو، نێچیرڤان بارزانی سەرۆكی ڕاسپێردراوی كابینەی حەوتەمی حكوومەتی هەرێمی كوردستان و مامۆستا عەلی باپیر ئەمیری كۆمەڵی ئیسلامی لە كۆنگرەیەكی ڕۆژنامەوانیدا ئاكامی كۆبوونەوەكەیان بۆ ڕۆژنامەنووسان خستەڕوو.


هیوای سەركەوتن بۆ كابینەی حەوتەم


لەبەرایی كۆنگرە ڕۆژنامەوانییەكەدا ئەمیری كۆمەڵی ئیسلامی وێڕای بەخێرهێنانی نێچیرڤان بارزانی وعیماد ئەحمەد ئاماژەی بەوەدا لەو دانیشتنەی كۆیكردنەوە كۆمەڵی ئیسلامی دەستخۆشیی لێكردن لەكاری ئایندەیاندا و هیوای خواست كابینەكەیان سەركەوتووتر بێت وگوتی: بەناوی خوای گەورە و میهرەبان

ئەمڕۆ جەنابی كاك نێچیرڤان بارزانی وكاك عیماد ئەحمەد دوای ئەوەی بەڕەسمی لەلایەن جەنابی سەرۆكی هەرێمی كوردستانەوە ڕاسپێردراون بەپێكهێنانی كابینەی حەوتەمی حكوومەتی هەرێمەوە، ئێمە دەستخۆشییان لێدەكەین و ئومێدم وایە جەنابی كاك نێچیرڤان وەكو سەرۆكی حكوومەت و جەنابی كاك عیماد وەكو جێگری كابینەیەكی وا پێكبێنن كەلەكابینەكانی پێشوودا سەركەوتووتر بێت و پەند لەهەڵە و كەموكوڕییەكانی كابینەكانی پێشووتر وەربگرن و دەستكەوتەكانی كابینەكانی پێشووش زیاتر بكرێن و ئومێدەوارین وچاوەڕانین و واشدەبینین حكوومەتێك پێكبهێنن هی هەموو خەڵك بێت و وادیارە حكوومەتی هەموو خەڵكە بە هەموو چین وتوێژەكان، ئەمەش بەشێكی بۆ خۆیانە بەهەڵبژاردنی كەسانی شیاو بۆ شوێنی شیاو پێشی ئینتیمای حزبی بە وەزیر یان هەر پلەیەكی ئیداری، بەلایەكی دیكەشەوە ئێمە وەكو ئۆپۆزیسیۆن بەرپرسیارێتیمان دەكەوێتە سەرشان كە هاوكار ودڵسۆزیان بین وڕەخنەی بونیادنەرانەیان لێبگرین لەدڵسۆزییەوە وبۆ كاری چاكیش دەستخۆشی وقەدر دانیمان هەبێت بەچاك بڵێین چاك وبەخراپیش بڵێین خراپ،هەروەها جەماوەر و خەڵكیش پێویستە ئەو حكوومەتە بەهی خۆیان بزانن، چونكە ئەو حكوومەتە لەكاتێكدا پێكدەهێنرێت كە كوردستان و ئێراق و ناوچەكە بەهەلومەرجی دژوار تێدەپەڕێت بۆیە پێویستە بەبەرپرسانە مامەڵە لەگەڵ ئەو كابینە حكوومییەدا بكەین چ ئەوانەی بەشداریی حكوومەت دەكەن یانیش ئەوانەی لەدەرەوەی حكوومەت. ئێمەش وەكو كۆمەڵی ئیسلامی بڕیارمان داوە بەشداریی حكوومەت نەكەین، بەڵام دڵسۆزانە لەدەرەوە دەبین وهاوكار و دەستبارگر بین وجەنابی كاك نێچیرڤانیش خۆی فەرمووی هەر شتێكتان بینی وهەستتان بەهەر كەموكوڕییەك كرد مافی خۆتانە گلەیی بكەن وئاگادارمان بكەنەوە، ئێمە سوپاسی ئەو هەڵوێستەشیان دەكەین، ئێمەش وەكو لایەنێكی ئیسلامی فەرمایشتەكەی پێغەمبەر (د.خ) دووپاتدەكەینەوە كەدەفەرموێ(ئایین ئامۆژگارییە، پێیان گوت بۆ كێ ئەی پێغەمبەر د.خ؟ فەرمووی : بۆ خوا بۆ كتێبی خوا، بۆ پێغەمبەر، بۆ بەرپرسانی موسڵمانان وخەڵكی بەگشتی) بۆیە ئێمە بەدڵسۆزانە كاردەكەین چونكە حكوومەتمان سەركەوتوو بێت ئێمەش سەركەوتوو دەبین، خوانەخواستە شكست بێنێت ئێمەش زەرەرمەند دەبین وجارێكی دیكەش دووپات لەسەر هەماهەنگی ئەو حكوومەتە دەكەین بۆ سەركەوتن لەكار و ئەركەكانیدا. ئێمە هەروەها بۆ جەنابی كاك نێچیرڤان وجەنابی كاك عیمادمان ڕوونكردەوە بۆچی بەشداریی حكوومەت ناكەین و ئێمە ئەمڕۆ هەڵوێستی فەرمیمان ڕاگەیاند.

 

یەكدەنگیمان پێویستە

 

دواتر نێچیرڤان بارزانی لە وتەیەكدا سوپاسی ئەمیری كۆمەڵی ئیسلامیی كرد بۆ ئەو پێشوازییە و گوتی: دەمەوێ بەناوی كاك عیماد وبەناوی خۆمەوە سوپاسی جەنابی مامۆستا بكەم بۆ ئەم پێشوازییە، هەروەكو جەنابیان فەرمووی كۆمەڵی ئسلامی بڕیاری خۆیان داوە لەدەرەوەی حكوومەت بمێنن وەكو ئۆپۆزیسیۆن، ئێمە ڕێزمان بۆ ئەو بریارەی كۆمەڵ هەیە و لەهەمانكاتیشدا پێمان وایە لەنێوان بەشداریكردن ونەكردن مەسافەیەكی زۆر هەیە بۆ پێكەوە كاركردن، وەكو مامۆستا فەرمووی ئەم وڵاتە وڵاتی هەموومانە و پێویستیی بەكۆدەنگی هەیە و هەموومان كاربكەین بۆ ئەوەی ئایندەیەكی گەش بۆ گەل ومیللەتەكەمان مسۆگەر بكەین، ئێمە زۆر سوپاسی فەرمایشتەكانی جەنابی مامۆستا دەكەین و واش پێشبینی دەكەین لەو ڕێگەیەی لەبەردەمماندایە بەڕەخنەكانیان وبەو پرۆژانەی هەیانە هەم كاری حكوومەت دەوڵەمەندتر بكەن، هەم بەناردنی پەیام و ئامۆژگاری بتوانین حكوومەتەكە بەرەو ئایندەیەكی گەش ببەین كە وای لێبكەین ببێتە حكوومەتی هەموو هاووڵاتییەك لەكوردستاندا، ئێمە هیوادارین خوای گەورە ئەو تەوفیقەمان بداتێ لەم ڕێگە سەختە بەهاوكاریی هەموو دڵسۆزانی گەلی كوردستان بتوانین سەركەوتوو بین.

 

لەگەڵ هەموو لایەنەكان قسە دەكەین

 

نێچیرڤان بارزانی دووپاتیكردەوە وەكو نەریتێك قسە لەگەڵ هەموو كەس ولایەنەكان دەكرێت كەلەگەڵیان كۆدەبنەوە بۆ بەشداری وپشتگیری لە حكوومەت وگوتی: ئێمە پرسی بەشداریكردن لە كابینەی حەوتەمی حكوومەتمان باسكردووە وئەو لایەنانەی ئەمڕۆ بەیانی بینیمان لەحكوومەتدا بەشدار دەبن وپێكهاتەی حكوومەت وەكو خۆی دەمێنێتەوە،وەزیر دەگۆڕدرێت، بەڵام ژمارەی وەزارەت وەكو خۆی دەمێنێتەوە. بەشدارینەكردنی لایەنێك لەحكوومەت واتای ئەوە نییە كەئیتر هیچ شتێك ناكرێت كە یان بەشدار دەبێت یان مەجالی هیچت نییە، جەنابی مامۆستاش لە سەختترین بارودۆخدا دووپاتی لەسەر ئەوە كردۆتەوە بەشتی باش بڵێت باش و بەشتی خراپیش بڵێ خراپ، ئەمە پەیوەندیی بەمڕۆوە نەبووە وپێشتریش ئەم ڕایەی هەبووە، ئەم پرەنسیپە بۆ ئێمە گرنگە كەسانێك لەدەرەوەی حوكمڕانی لەگەڵ ئێمە كاروانەكە بەڕێوە ببەن وئەمە ئەركێكە لەسەرشانی هەموولایەكمانە ومن پێموایە لەم ڕێگەیەش هەریەك بەكاری خۆی هەڵبستێ ئۆپۆزیسۆن بزانێ ئیشی چییە ودەسەڵاتیش بەتەواوی بزانی كاری چییە و هەروەها ڕۆژنامەنووسانیش هەروەها لایەن و پێكهاتەكانی دیكە.

 

دیاردەی ئۆپۆزیسیۆن لە كوردستان

 

نێچیرڤان بارزانی هەبوونی ئۆپۆزیسیۆنی لە هەرێمی كوردستان بەشتێكی تەندروست وەسفكرد چونكە دەتوانێت یارمەتیی حكوومەت بدات و گوتی:ئۆپۆزیسیۆن دەتوانی لەناو پەرلەماندا بەكاری باش بڵێت باش و ڕەخنە لەهەر كەموكوڕییەك بگرێت وچارەسەری بكات و بەبۆچوونی منیش ئەو قۆناغەی ئەمڕۆ كوردستان پێیدا تێدەپەڕێ ئێمە بەر لە پێویستی بە دەسەڵات وئۆپۆزیسیۆن پێویستیمان بەكۆدەنگی هەیە و هەموومان لەیەك پاپۆڕداین ولەقۆناغی ئێستادا كۆدەنگیمان هەبێت زۆر باشترە لە دەسەڵات وئۆپۆزیسیۆن بەڵام ئۆپۆزیسیۆن دەتوانێ بەڕەخنە و بۆچوونەكانی خزمەت بە پرۆسەكە بكات. ئێمە پێویستیمان بەیارمەتیی ئۆپۆزیسیۆن هەیە بۆ چاودێریی حكوومەت ونەك تەنها ئۆپۆزیسیۆنیش بەڵكو لیستەكانی دیكەش دەتوانن ئەو چاودێرییە بكەن بۆ ئەوەی وابكەن حكوومەت كاری باشتر بكات، بێگومان جەماوەر تێبینیی لەسەر ئۆپۆزیسیۆن وهەردوو حزبی دەسەڵاتداریش هەیە و ئێمە ئێستا لە قۆناغێكی كاتیداین و لەم قۆناغەدا كۆمەڵێك تێبینی لەسەر میدیا و ئۆپۆزیسیۆن وحوكمڕانیش هەیە، ئێمە دەبێ هەوڵبدەین ئەو قۆناغە بەجێبهێڵین وبارودۆخ ببەینە سەر سكەیەك لەخێری كورد دا بێت.

هەر لەمبارەیەوە مامۆستا عەلی باپیر گوتی: بەئیشە ئیجابییەكانی ئێوە و كراوەییتان كەسەردانی هەموو لایەنەكان دەكەن زەمینە بۆ ئەم تەبایی وكۆدەنگییە لەئایندەدا خۆش دەبێت.

 

پاڵپشتیی هەر هەنگاوێك بۆ بەرەنگاربوونەوەی گەندەڵی

 

نێچیرڤان بارزانی لەمبارەیەوە گوتی: گەندەڵی تەنها لەیەك پرۆژەدا نییە بەڵكو بۆتە مەسەلەیەكی كولتووری و دەبێ دەسەڵات ومیدیا هەموولایەك بەرەنگاری ئەم دیاردەیە ببینەوە و ئەگەر ئێمە بەیەكەوە دەست لەناو دەست نەكەین بۆ بەرەنگاربوونەوەی ئەم دیاردەیە ناتوانین سەربكەوین، ئەگەر میدیا و ڕێكخراوی ناحكوومی و حزبە سیاسییەكان یارمەتیی ئێمەیان نەدا ئێمە چۆن دەتوانین بەرەنگاری گەندەڵی ببینەوە؟دەبێ ئێمە هەموومان كار بۆ نەهێشتنی ئەم دیاردەیە بكەین كە هەیە.

هەر لەمبارەیەشەوە ئەمیری كۆمەڵی ئیسلامی هەر هەنگاوێكی سەركردایەتیی سیاسیی كوردستان وحكوومەتی بۆ بەرەنگاربوونەوەی گەندەڵی بەكارێكی ئیجابی وەسفكرد و دووپاتیكردەوە هەر كارێك نەخۆشییەكانی كۆمەڵگا دەستنیشان بكات و چارەسەرییان بكات كارێكی ئیجابییە و خەڵكی چاوەڕوانیی زیاترن لەجەنابی سەرۆكی كوردستان، چونكە ئەو بارودۆخەی ئێمە پێویستیی بەچارەسەریی باشترە و سەرۆكی كوردستانیش بەرپرسیارێتییەكی قورستری دەكەوێتە سەرشان وهیوای خواست كاری وابكات بۆ ڕازیكردنی جەماوەری خەڵكی كوردستان چەند كەسێك كە ژمارەیەكی كەم پێكدێنن لێكۆڵینەوەیان لەگەڵ بكات و دەستی هەر كەسێك ببڕدرێت كە موقەدەراتی ئەم گەل ومیللەتە قۆرخ دەكات. هەروەها گوتی: ئێمە ئەگەر بمانەوێ سیستەمی حوكمڕانیی خۆمان چاك بكەین دەبێ سیستەمی پەروەردەییمان چاك بكەین وەك خوای گەورە دەفەرموێ(ان اللە لایغیر مابقوم حتی مایغیروا ما بانفسهم) دەبێ ئێمە بەسەركردایەتیی سیاسی و نووسەر و ڕاگەیاندنكارانیشەوە بەدواداچوونێكی باشی خۆمان بكەین و لەم وڵاتە ناگونجێ شتی موقەدەس وبەڕێزمان نەبێت وڕێز لەكەس نەگرین، ناگونجێ موزایەدە بەسەر یەكترەوە بكەین داخوا كێ وشەی ناشیرین بەوەی دیكە دەڵێت وكێ تەشهیر بەوەی دیكە دەكات ئەگەر ڕێزمان لەیەكتر نەگرت دەبینە میللەتێكی بێ ڕێز. بۆیە پێویستە خەڵكیش دووبارە خۆی بونیاد بنێتەوە، ڕاستە كەموكوڕی زیاتر لەلایەن حوكمڕانەوە دەردەكەوێت بەڵام ڕەنگەی ئەوەی ڕەخنە دەگرێت بێتە شوێنی حوكمڕان لەو باشتر نەكات بۆیە پێویستیمان بەگۆڕینی باكگراواندی هزریی خۆمانە بەنەهێشتنی كولتووری چەندین ساڵەی بەعس لەمێشكماندا ئەمەش بەكەسێك و دووكەس و بەتەنها حوكمڕان ناكرێت، هەموومان دەتوانین وڵات ئاوەدان بكەینەوە بەڵام تێكدان یەك كەس دەتوانێ بیكات.

 

هەوڵدان بۆ كاری باشتر


بارزانی دووپاتیكردەوە لەكابینەكانی پێشووتردا كاری باش كراون، بەڵام سەرەڕای ئەوەی ماوەكەی كابینەی حەوتەم كورتە هەوڵی ئەوە دەدەن كاری باش بكەن و گوتی: ئەگەر هەڵسەنگاندنێكی ئیجابیی كارەكانی كابینەی شەشەم بكەین بەسەرۆكایەتیی د.بەرهەم دەبینین ئەوان كاری باشیان كردووە، مومكینە هەندێ كەموكوڕییان هەبێت كە ئێمە لەكابینەی پێنجەمیش ئەو كەموكوڕییانەمان بۆیان بەجێهێشتووە وئەم كاروانە بەردەوام دەبێت، ئێمە سوپەرمان نین و داری سیحراویمان پێ نییە كە تەنها قسەی گەورە بكەین و بڵێین كاری باش دەكەین و هیچ كێشە نامێنێت، بەڵام ئێمە هەموو هەوڵێك دەدەین بۆ خزمەتكردنی زیاتری ئەم وڵاتە.

 

 
چاپکردن   Share گه‌ڕانه‌وه‌