2010-07-11

خەبات- ئاسۆ عەلی فەرەج:

پارتی دیموكراتی كوردستان لە روانگەی خواستی خەڵكی كوردستانەوە هەمیشە ئەو هەنگاوانەی فەرامۆش نەكردووە دەبنە مایەی رەزامەندی خەڵكی كوردستان و خزمەتی زیاتریان، لە دوا گۆڕانكارییەكانی پارتیدا، چەند لقێك لەڕووی هەیكەلی بەرپرسی لقەوە گۆڕانكاری تێدا كرا، لە پێناو زیاتر گرنگیدان بە ئەجێندای ناوخۆیی پارتی وەك خزمەتكردنی خەڵك و نزیكبوونەوەی رێكخستنەكانی پارتی لە پێگەی خۆیەوە بۆ ناو جەماوەرەكەی، لقی 4ی پارتی دیموكراتی كردستان لە شاری سلێمانی یەكێك بوو لەو لقانەی بەرپرسێكی نوێ بۆ دانرا، لە دیمانەیەكی تایبەت بە خەبات، هیوا ئەحمەد مستەفا بەرپرسی لقی 4ی پارتی دیموكراتی كوردستان، تەئكید لە پابەندبوونی پارتی دەكاتەوە بۆ خزمەتكردنی شاری سلێمانی و شارەكانی دیكەی كوردستان.

هیوا ئەحمەد مستەفا بەرپرسی لقی 4ی پارتی دیموكراتی كوردستان لە سلێمانی دەربارەی ئەوەی، گۆڕانكارییەكانی پارتی هەمیشە لە ویستی خەڵكەوە سەرچاوەی گرتووە، پارتی لەم ماوەیەدا چەند گۆڕانكارییەكی لە چەند لقێكردووە، لقی 4ی پارتیش لەم گۆڕانكاریانەدا بوو، ئایا ئەو ئالیەت و میكانیزمانە نوێیانە چین، كە پارتی دیموكراتی كوردستان دەیەوێ خزمەتی خەڵكی دەڤەری سلێمانی پێبكات؟ ناوبراو ئاماژەی بەوەكرد، پێداچوونەوەمانە بە كارەكانی ڕابردووی لق ئەو شتە باشانەی كراون لەسەریان بەردەوام دەبین، ئەو شتانەی كراون و سلبیاتیان هەبووە دەیانوەستێنین و ئەوانەی باش بوون بكرێن و نەكراون هەوڵی كردنیان دەدەین. هیوا ئەحمەد مستەفا درێژەی بەو ویستەی پارتی دیموكراتی كوردستانیدا، كە لەگەڵ خواستی خەڵكی سلێمانییە و گوتی: دەمانەوێت لە جەماوەر و ئەندامانی ڕێكخستنەكانی خۆمان زۆر نزیك بینەوە، هەوڵدەدەین نەهێڵین دڵی خەڵكمان لێبڕەنجێی و ئەوەی ڕەنجاوە ئاشتی بكەینەوە لەوانەشمان زۆرە بۆ نموونە 23 خێزانی پارتی كە چووبونە ناو برایانی ئۆپۆزسیۆنەوە و دەنگیان بەلیستێك دابوو هاتنەوە ناو پارتی، ئێمە دانیشتین لە گەڵیاندا، یەكێكیان گوتی: ئێمە كە دەنگمان بە پارتی نەدا فرمێسك بە چاوما دەهاتە خوارەوە، ئەوەندە پەرۆشی پارتی بوو، بەڵام دیسان لە دڵسۆزیم بۆ پارتی دەنگم بە پارتی نەدا بۆ ئەوەی پارتی بە خۆیدا بچێتەوە هەندێ گۆڕانكاری لە ناو بەرپرسەكان و سیستەمی كاری خۆیدا بكات و گرنگی زیاتر بەشاری سلێمانی بدات. ئەوە نموونەیەكە دڵنیام كە خەڵكێكی زۆری ئاوهامان هەیە لە پەیوەندیە كۆنەكانمان پێیانەوە بەردەوام دەبین بۆ ئەوەی دڵی خەڵكی خۆمان ئاشت بكەینەوە ئەوانەی تا ئێستاش پارتی نەبوون و بێلایەنن باوەشیان بۆ دەكەینەوە بێنە ڕیزی پارتی.

هەندێك راگەیاندن بە چەند زمانێكی جیاواز قسە لەسەر ئەم جۆرە گۆڕانكاریانە دەكات، هەندێكیان دەڵێن: دوای سەرنەكەوتنی پارتی لە سلێمانی گۆڕانكاری كراوە، هەندێكیان دەڵێن: دانانی هیوا ئەحمەد مستەفا بۆ تەسفیاتە بەرامبەر ئەو رەوشەی پارتی لەو ناوچە تێكەوتووە، ئەم پرسیارەمان رووبەڕووی بەرێز هیوا ئەحمەد مستەفا بەرپرسی لقی 4ی پارتی دیموكراتی كردستان كرد و ناوبراو، وێڕای رەتكردنەوەی ئەو تۆمەتانە ئاماژەی بە پەیامی پارتی بۆ شاری سلێمانی كرد و گوتی: دانانی من بۆ تەسفیات نازانم مەبەست لە چیە؟ ئەگەر بۆ ئەوەبێ بۆجارێكی دیكە پارتی لە مەیدانەكە بەكردەوە خزمەتی شارەكە بكات و ئەو شەرەفە بەمن ببەخشێ ئەو بەشەم بەربكەوێ ئەوە ڕاستە و ئومێدم زۆر بە بەڵێنەكانی سەركردایەتی خۆمان هەیە و بەبڕیار و بەڵێنەكانی جەنابی سەرۆك مسعود بارزانی و مەكتەبی سیاسی بەڕێز هەیە و ئەو بەڵێنەم وەرگرتووە پشتمان دەگرن. بەرپرسی لقی 4ی پارتی دیموكراتی كوردستان تەئكید لە هەوڵ و كۆششی پارتی بۆ سلێمانی كردەوە و گوتی: ئێمە بۆ سلێمانی هاتووین پەیامی ئاشتی و برایەتیمان پێیە و دەمانەوێ بە خەڵكی سلێمانی بڵێین هەرچی لە توانامان هەبێ بەكاری دەهێنین بۆ خزمەتی نووسەران و ڕۆشنبیران و هونەرمەندان و كاسبكاران و قوتابیان و كچان و كوڕان و.. هتد، بەڵام بە بەرنامە و بەسیستەمێك كە لە چوارچێوەی دەسەڵاتی ئێمەدایە، سەرەتا پەیوەندی دروست دەكەین پاشان گوێ لە ڕاو پێشنیاریان دەگرین ئەوجا دەستدەكەین بەپشتیوانی و هاوكاریمان بۆیان ئەوەی لە توانای ئێمەدا بێت، ئێمە حەزمان لە كاری حزبیە شەویش دانانیشین و بەشێوەی شەفت لەگەڵ هەڤاڵانم لەلقی 4 لە سەردان و گەڕان و كۆبوونەوە و پرسە و خۆشی و ناخۆشیەكاندا بەشدارین، من وەك بەرپرسی لق لەهەموو كاتەكان هەر لەگەڵیاندام و بەیەكەوە كاری بە هەرەوەزو بڕیاری بەكۆمەڵ لەسەر شتەكان دەدەین، وەك هاوڕێ ووەك یەك خێزان كار دەكەین بۆ ئەوەی بتوانین خزمەتێك بەخەڵكی شاری سلێمانی بكەین و دیەشیكەین بە پشتیوانی خوا.

لە بەرپرسی لقی4ی پارتی بەڕێز هیوا ئەحمەد مستەفامان پرسی، پارتی نەك ناوچەگەرێتی ناكات، بەڵكو دژایەتی ئەو بیرۆكانەش دەكات، كە بۆنی ناوچەگەرێتی لێبێت، بەڵام دەكرێت بزانین پارتی لە سلێمانیدا دوای ئەم گۆڕانكارییانە چی دەكات؟ ناوبراو ئاماژەی بەوەكرد، بیركردنەوەی پارتی فراوانە ڕوئیاو تێڕوانینی ئێمە لە جەنابی سەرۆك بارزانیەوە سەرچاوەی گرتووە، كە دوورە لەهەستی ناوچەگەرێتی ئەم كلتوورە لە مێژووی پارتیدا بەزەقی دیارە پێشمەرگەی خەڵكی دهۆك لە كەركووك و خانەقین شەهید بووە و پێشمەرگەی سلێمانی و كەركووك و خانەقین لەبادینان و سەفین و هەندرێن شەڕی كردووە و خەباتی كردووە.

كادرو پێشمەرگەی خەڵكی شاری سلێمانی سەركردایەتی ناوچەكانی دهۆك و ئاكرێ و بارزانی كردووە و خەڵكی هەولێر و ڕانیەو قەڵادزەش لەناوچەكانی سلێمانی خۆیان بە كوشتداوە لە پێناو ئامانجێك ئەویش ئازادی بۆ كوردستان بووە، بۆیە ئەو بابەتە لەناو پارتی نەك هەربوونی نییە تەنانەت باسكردنیشی وەك شەرم دێتە ژماردن و شورەییە. ئێمە خەڵكی كوردستانین كوردستانیانە بیر دەكەینەوە و ڕەفتار دەكەین ئیتر گرنگ نییە خەڵكی كام شار و گوندی ئەم وڵاتەین، هەموومان كەسوكار و خوشك و برای یەكترین. بەرپرسی لقی4 ی پارتی تەئكیدی لە رەفتار و هەڵسوكەوتی كوردستانیانەی شاری سلێمانیداو گوتی: خەڵكی شاری سلێمانیش بەرچاو تەنگ نین خۆیان ئازاری بەرچاو تەنگیان چەشتووە ئەوان ئەو كەسەیان خۆشدەوێت ڕەوشت بەرز بێ و دڵسۆز بێ و ژیر و هێمن بێی وچالاك وهەڵسوڕا و بێت و نیەت پاك و باش بێ و خزمەتیان بكات ئیتر ئەو كەسە خەڵكی هەر شوێنێك بێ گرنگ نیە.

لەڕووی پەیوەندییەكانەوە ئایا پارتی لە سلێمانی دەیەوێت ئەو پەیوەندییە بەهێزەی لە نێوان یەكێتی نیشتمانی كوردستان هەیەتی پیبارێزی و لە پاڵ ئەوەشدا لەگەڵ لایەنەكانی دیكە پەرە بەو پەیوەندییانە بدات؟ لەبارەی ئەم پرسیارەوە بەرپرسی لقی 4ی پارتی بەڕێز هیوا ئەحمەد مستەفا ئاماژەی بەوە كرد، بەڵێ دەمانەوێ پەیوەندی ئێمە و برایانمان لە ی.ن.ك لەوپەڕی بەهێزیدا بێت، وەك یەك ئێمە كار بكەین بۆ ئەوەی بتوانین ڕەوشی شارەكە لەوەی ئێستا ئەگەر باشە باشتری بكەین و هەڵوێستی خۆمان لەمەڕ بابەتە چارەنووسسازەكان یەكخەین، ئەگەر ڕای پێچەوانەشمان لەسەر شێوازی كاركردن هەبێ كارێكی ئاساییە، چونكە ئێمە دوو پارت و دوو حزبی جیاوازین ڕەنگە بیركردنەوە و كاركردنیشمان بۆ زۆر شت جیاواز بێ جا لەبابەتی خزمەتگوزاری شاربێ یان بابەتی دیكە، بەڵام گرنگ ئەوەیە ئێمە پەیوەندیمان زۆر باشە وزۆر بەباشی دەمێنێ. لەبارەی پارتەكانی دیكەش هیوا ئەحمەد مستەفا ئاماژەی بەوەكرد، سەبارەت بە پارت و ڕێكخراوو بزووتنەوە سیاسیەكان، ئەمیش بەهەمانشێوە دەستی برایەتیمان درێژ كردووە بۆ هەموویان، چونكە ئێمە بەدوای كارێكدا دەگەڕێین كە سەلامەتی و ئاشتەوایی و ئاسایش و دڵنیایی بۆ هاووڵاتیانی شارەكە دابین بكات. ئێمە دەمانەوێ لێك لە بیانوو نەبین و كەموكورتیەكانی یەكتریدا (مێشێك نەكەین بە گامێش) دەمانەوێ كێشەی گەورە بچووك بكەینەوە كێشەی بچووك ئەگەر هەبێ نەیهێڵین ئەگەر هەر نەكرا لە چوارچێوەی یاسادا چارەسەریان بۆ بدۆزینەوە. بەرپرسی لقی4 یش ئاماژەی بەو ویستی خەڵكی سلێمانی لەمبارەیەوە كرد و گوتی: خەڵكی سلێمانیش دەیانەوێ حزبەكان و حكوومەت خزمەتیان بكەن نان ژیان و ئاسایشیان بۆ دابین بكەن ئێمەش ڕێك لەگەڵ ئەوەین، بەڵام ئەو شتانە هەمووی دەبێ ڕێكبخرێن وەك بابەت، نەهێشتنی بێكاری و نەهێشتنی ژاوەژاو و ئاڵۆزی و نەهێشتنی بێخزمەتی، ئەگەر خەڵكی شاری سلێمانی پشتیوانی پارتی بكات پارتی نیەتی وایە زەخت بكات بۆ ئەوەی ئەو شتانە بكات بۆ شارەكە لەڕێگەی حكوومەت ئامرازی دیكەی جۆراوجۆری یاسایی.

 

گەنجان هەمیشە چاویان لەوەیە لەم جۆرە گۆڕانكاریانەی پارتیدا پێگە و جێگەیان زیاتر بكرێتەوە، ئێوە بەنیازن لەڕووی گرنگیدانە بەگەنجان لە سلێمانیدا چی بكەن؟ هیوا ئەحمەد مستەفا جگە لە نیشاندانی هەستی پارتی بەرامبەر گەنجان، وەك موژدەیەكیش بۆ گەنجان رایگەیاند، لە ئایندەدا پارتی بە گەنجان خوێنی خۆی نوێ دەكاتەوە و لەوبارەیەوە گوتی: ئامانجی ئێمە گەنجەكانن، دەمانەوێ داكۆكی لە پرۆژەی گەنج بكەین بۆ خزمەتی ئەوان، ئامانجی ئێمە خزمەتی گەنجەكانی شاری سلێمانییە، با لێمان بێنە پێشەوە بانزیك بن لێمان بۆ ئەوەی هەرچی پێمان دەكرێت كاریان بۆ بكەین، بەڵام دەبێ خۆشیان پرۆژەیان هەبێت بۆ ئەوەی ئێمە لە جیاتی ئەوانیش بیرنەكەینەوە بڕوامانوایە دەبێ گەنجەكان بێنە پێشەوە، باشتر بۆت ڕوون بكەمەوە: دوای كۆنگرە دەمانەوێ لە ڕێكخراو و ناوچەكانەوە تاوەكو ناو لق كۆمەڵێك گەنجی خوێن گەرمی ڕۆشنبیر بێنە ناو ئۆرگانەكانی پارتی، كە بەهەموو شێوەیەك هەست بكرێت خوێنێكی تازە تەوژمێكی تازە و تەكانێكی تازە بدات بەپارتی.

 
چاپکردن   Share گه‌ڕانه‌وه‌