2010-07-17

دۆستی خۆشەویستم د. تیسۆ كونسوڵی فەڕەنسا لەهەولێر

زۆر زۆر سوپاست دەكەم بۆ داوەتكردنم بۆ بەشداری كردنتان لەم ڕۆژە مێژووییەدا، من ئەو دەرفەتە دەقۆزمەوەو پیرۆزبایی گەرم لەدەوڵەت وسەرۆك وحكوومەت وگەلی فەڕەنسا دەكەم.

ڕۆژی چواردەی تەممووز ڕۆژێكی مێژوییەو لەمێژووی گەلی فەڕەنساو گەلی ئێراقیشدا، بەڵام میللەتی فەڕەنسا دوای شۆڕشی چواردەی تەممووزی فەڕەنسا بەرەو سەركەوتن وپێشكەوتن وبەختەوەری ڕۆیشت بەڵام بەداخەوە لەئێراق وانەبوو بەرەو ماڵوێرانی ڕۆیشت. دەمەوێ سوپاسی میللەتی فەڕەنساو دەوڵەتی فەڕەنسا بكەم كەهەمیشە لەهەموو قۆناغێكدا ئێمە هەستمان كردووە كە عەتفێكی تایبەتی بەرامبەر بەمیللەتی كوردو كێشەی كورددا هەبووە،من هیچ كاتێك ناتوانم فرمێسكەكانی مەدام میتران لەیاد بكەم كە دوای ئەنفالی گەورە كەبەسەر میللەتی كورددا هات من لەساڵی1989 هاتمە پاریس خۆیشی هات كۆمەك ویارمەتیی بۆ ئاوارەكانی كوردستانی ئێراق لەخیوەتگاكانی توركیادا هێنابوو فرمێسكی بۆ دەڕێشتن.

هەروەها من دەمەوێ ئاماژە بەسەفەری مانگێك لەمەوبەر بكەم كەوەكو ئەمڕۆ و وەكو ئەو كاتژمێرە من گەیشتمە پاریس وجارێكی دیكە دەمەوێ سوپاسی جەنابی سەرۆك ساركوزی ودۆستی خۆشەویست د.بیرنارد كۆشنێر بكەم بۆ ئەو پێشوازییەو ئەو گرنگییەی بەسەفەرەكەی ئێمەیان دا.

ئەو یادداشتنامەیەی لەگەڵ بەڕێز كۆشنێر ئیمزامان كرد ئێمە بەوەرچەرخانێكی دەزانین لەپەیوەندیی نێوان میللەتی كوردو فەڕەنسا، خۆشبەختانەش ئێمە ئەمڕۆ كۆبوونەوەی ئەنجوومەنی وەزیرانمان هەبوو كەمنیش تیایدا بەشداربووم ومیكانیزمی جێبەجێكردنی و بردنی ئەو یاداشتنامەیە بۆ قۆاغی جێبەجێكردن باسی لێوە كراو بڕیار لەسەر میكانیزمی جێبەجێكردن درا وئومێدەوارین پەنا بەخوا بەزووترین كات هەردوولا بۆ جێبەجێكردنی ئەو یاداشتنامەیە دەستبەكاربین.

هەروەها دەمەوێ پێزانینی خۆم بەجەنابت ڕابگەیەنم بۆ ئەو ڕۆڵە پیرۆزەی كە جەنابت لەبەرەو پێشبردنی پەیوەندیی ئێمەو فەڕەنسا بینیوتە.

جارێكی دیكە پیرۆزباییتان لێدەكەم وسوپاستان دەكەم بۆ داوەتكردنم.

 

 
چاپکردن   Share گه‌ڕانه‌وه‌