2017-08-27

شانەی راگەیاندنی جەنگ لە زاری فەرماندەی كردەوەگەلەكانی "وا هاتین تەلەعفەر"، كۆنترۆڵكردنەوەی سەنتەری شارۆكەی تەلەعفەری لە چەكدارانی داعش راگەیاند.

ئەمڕۆ یەكشەم 27ـی ئاب  عەبدولئەمیر رەشید یاروڵا فەرماندەی كردەوەگەلەكانی وا هاتین نەینەوا ڕای گەیاندووە، سەنتەری شارۆكەی تەلەعفەر كۆنتڕۆڵ كرایەوە و بەپێی بەیاننامەكە، هێزەكانی فیرقەی نۆی زریپۆش و هەردوو لیوای 29 و 11ی حەشدی شەعبی، گەڕەكەكانی عەسكەری، پیشەسازی باكور، ناوچەی پیشانگەكان و دەروازەی‌ تەلەعفەر و گوندی رەحمەیان كۆنترۆڵ كردەوە، بەمەش  تەواوی گەڕەكەكانی تەلەعفەر كۆنترۆڵ كرانەوە.

لە بەشێكی ڕاگەیەنراوەكە هاتووە، لە گۆڕەپانی كردەوەگەلەكانی وا هاتین نەینەوا، تەنیا شارەدێی عیازییە و گوندەكانی دەروبەری ماوە، هەروەها ئێستە هێزەكانیان بەرەو شارەدێی ‌عیازییە‌ جووڵەیان پێ كراوە.

كردەوەگەلی كۆنتڕۆڵكردنەوەی شارۆكەی تەلەعفەر لە پارێزگای نەینەوا، بەرەبەیانی 20ـی ئاب دەستی پێ كرد‌ و لە چەند رۆژی شەڕەكەدا، چەندان گەڕەك ‌و گوند ‌و ناوچەی دەوروبەری شارۆكەكە ‌و ناوشاریش لە ژێر دەستی داعش دەرهێنراوە.

 
چاپکردن   Share گه‌ڕانه‌وه‌