2017-10-03

 سەرۆکی فراکسیۆنی پارتی لە ئەنجومەنی نوێنەرانی عێراق، بڕیارەکەی ئەمڕۆی پەرلەمانی بەغدا بە بڕیارێکی نایاسایی ناو دەبات و پێی وایە، ئەوەش بڕیارێکی تری ئابڵۆقەدانانە لەسەر هەرێمی کوردستان. هاوکات دەڵێت، ئێمەش، وەک هەرێم چەندین کارتی فشارمان هەیە.

وێڕای نەهێشتنی بەشداریکردنی پەرلەمانتارە کوردەکانی ئەو فراکسیۆنانەی گەڕابوونەوە بەغدا، بەشداریی دانیشتنی ئەمڕۆی پەرلەمان بکەن، کە چەندین پڕۆژەیاسا دەنگی لەسەر دەدرا، هاوکات بە زۆرینەی دەنگی پەرلەمانتارە عەرەبەکان، بڕیار لەسەر ڕاگرتنی مامەڵە دارایی و بانکییەکانی بەغدا لەگەڵ هەرێم درا.

(عەرەفات کەرەم) لە لێدوانێکیدا بۆ ماڵپەڕی فەرمیی پارتی دیموکراتی کوردستان ڕایگەیاند: ''لە بەغدا بێ ئەوەی بگەڕێنەوە سەر دەستوور، بێ ئەوەی دیراسە بکەن، وەک فشارخستنە سەر هەرێمی کوردستان بڕیار لەسەر بڕیار دەردەکەن.''

لە دوای ئەنجامدانی پڕۆسەی ڕیفرەندۆمی سەربەخۆییی هەرێمی کوردستان لە ٢٥ی ئەیلوول، بەغدا چەندین بڕیاری وەک فشار لەسەر هەرێمی کوردستان دەرکردووە، ئەوەش لە پێناو سازشکردن بە سەرکردایەتیی سیاسیی هەرێمی کوردستان، تاوەکو لە ئەنجامی ڕیفراندۆم پاشگەز ببنەوە، سەرۆک فراکسیۆنەکەی پارتی دەڵێت: ''ئەم بڕیارەی ئەمڕۆشیان یەکێکی ترە لە فشارەکانیان تاوەکو ڕیفراندۆم هەڵوەشێنینەوە.''

ناوبراو ئاماژە بە تووڕەیی هاووڵاتییانی هەرێمی کوردستان لە هەمبەر ئەو بڕیارە نایاساییانەی بەغدادا دەکات و پێی وای: ''گەر سەرکردایەتیی سیاسیی هەرێم، ئێستا بە هاووڵاتیان بڵێ بڕۆنەوە سەر سندووقەکانی دەنگدان، دەنگ بۆ هەڵوەشاندنەوەی ڕیفراندۆم بدەن، بە پێچەوانەوە ڕێژەی دەنگدان بۆ سەربەخۆییی دەگاتە ٩٩%..''

سەبارەت بەو هەمووە فشارەی بەغدا لەسەر هەرێمی کوردستان، (کەرەم) گوتیشی: ''گەر بەغدا سوور بوو لەسەر ئەوەی ئێمە ڕیفراندۆم هەڵوەشێنینەوە، ئەوکات گفتوگۆمان لەگەڵ دەکات، کە ئێمە هەرگیز ئەوە ناکەین، ئەگەر بەردەوامیش بێت لەسەر فشارەکانی، ئێمەش وەک هەرێم کارتی فشاری بەهێزمان هەیە.''
ناوبراو هۆکاری بەکارنەهێنانی ئەو کارتە فشارانەی هەرێمی کوردستان بەرامبەر بەغدا، بۆ ئەوە دەگێڕێتەوە، کە نایانەوێت دەرگای گفتوگۆ دابخەن و دەڵێت: ''دەمانەوێت، دەرگای گفتوگۆ هەمیشە کراوە بێت و بە ئاشتی و لێکتێگەیشتن گفتوگۆ بکەین و بگەینە ئەنجام، نەک بە دەربڕینی هێز و بەکارهێنانی کارتی فشار.''

لەمەڕ وەڵامدانەوەی ئەو بڕیارەی ئەمڕۆی پەرلەمانی بەغدا بەرامبەر هەرێم، سەرۆکی فراسیۆنەکەی پارتی پێی وایە: ''پێویستە پەرلەمانی هەرێمی کوردستان کۆ ببێتەوە و بە پێی یاسا وەڵامی بۆ ئەو بڕیارە سیاسییەی بەغدا هەبێت.''

 
چاپکردن   Share گه‌ڕانه‌وه‌