2017-10-08

خه‌بات‮: ‬سەرهەنگ نەجمەدین

ماوەیەكی‮ ‬زۆرە تیپەكانی‮ ‬فوتساڵی‮ ‬كچانی‮ ‬یانەكانی‮ ‬كوردستان چاوەرێی‮ ‬كردنەوەی‮ ‬خول و پاڵەوانیەتی‮ ‬دەكەن لەلایەن‮ ‬یەكێتی‮ ‬ناوەندی‮ ‬تۆپی‮ ‬پێی‮ ‬كوردستان،‮ ‬ئەم هەفتەیە لەبڕیارێكی‮ ‬یەكێتی‮ ‬ناوەندی‮ ‬تۆپی‮ ‬پێی‮ ‬كوردستان كەئاگاداری‮ ‬سەرجەم تیپەكانی‮ ‬فوتساڵی‮ ‬كوردستانی‮ ‬كرد كە خولی‮ ‬فوتساڵی‮ ‬كچانی‮ ‬یانەكانی‮ ‬كوردستان دەستپێدەكات،‮ ‬جا بۆ ئەم مەبەستە تیپی‮ ‬فوتساڵی‮ ‬ئافرەتانی‮ ‬هەولێر بەسەرپەرشتی‮ ‬راهێنەری‮ ‬بەتوانا مەزن محەمەد عەبدوڵڵا ماوەیەكی‮ ‬زۆرە ئامادەكارییەكی‮ ‬تەواو بۆ خولەكە دەكات و هەر بەم هۆیەوە لاپەرەی‮ ‬وەرزشی‮ ‬خەبات ئەو راهێنەرەی‮ ‬لەبارەی‮ ‬چۆنیەتی‮ ‬خۆئامادەكردنیان بۆ خولی‮ ‬فوتساڵی‮ ‬كچانی‮ ‬یانەكانی‮ ‬كوردستان بەچەند پرسیارێك بەسەر كردەوە و سەرەتا راهێنەر مەزن محەمەد لەبارەی‮ ‬ئامادەكارییەكانیان بۆ خولەكە ئەو بەوشێوەیە رایگەیاند‮: ‬پێشوەختە دەبێ سوپاسی‮ ‬ئەندامانی‮ ‬یەكێتی‮ ‬ناوەندی‮ ‬تۆپی‮ ‬پێی‮ ‬كورستان بكەین كە بڕیاری‮ ‬كردنەوەی‮ ‬خولی‮ ‬فوتساڵی‮ ‬یانەكانی‮ ‬كوردستانیان راگەیاند،سەرەرای‮ ‬هاتنی‮ ‬قەیرانی‮ ‬دارایی‮ ‬و نەبوونی‮ ‬هیچ مووچەیەك‮ ‬بۆ‮ ‬یاریزانان،‮ ‬ئینجا بەردەوامین لەمەشق وراهێنان و خۆئامادەكردنمان بۆ خولەكە،‮ ‬بێگومان بۆ ئەم وەرزەیش دەمانەوێ ئەنجامی‮ ‬وەرزی‮ ‬ڕابردووی‮ ‬خولی‮ ‬عێراق لەخولی‮ ‬كوردستان دووبارە بكەینەوە كە پلەی‮ ‬یەكەممان لەخولی‮ ‬عێراق بەشایستەیی‮ ‬بەدەستهێنا،‮ ‬بۆ ئەم وەرزەیش هیچ كێشەیەكی‮ ‬ئەو تۆمان لەپێكهاتەی‮ ‬تیپەكە نییە و هەر لەگەڵ دەستپێكی‮ ‬خولەكە پەنا بەخودا بەئاستێكی‮ ‬بەرز و بەهیمەتی‮ ‬یاریزانانی‮ ‬تیپەكە لەنێو‮ ‬یاریگا‮ ‬بۆ‮ ‬یاریكردن ئامادە دەبین‮.‬

هەر لەبارەی‮ ‬رۆیشتی‮ ‬هەندێك‮ ‬یاریزان بۆ‮ ‬یانەكانی‮ ‬دیكەی‮ ‬كوردستان لەرێزی‮ ‬پێكهاتەی‮ ‬تیپەكەیان مەزنی‮ ‬راهێنەر بۆ ئەم مەبەستەیش گوتی‮: ‬ئەم وەرزە نزیكەی‮ ‬چوار‮ ‬یاریزانمان روویانكردنە‮ ‬یانەكانی‮ ‬دیكەی‮ ‬كوردستان،‮ ‬بەڵام خۆشبەختانە لەشوێنی‮ ‬ئەوان چەند‮ ‬یاریزانێكی‮ ‬دیكەی‮ ‬ئاست بەرزمان‮ ‬دەستنیشانكرد و هێناومانەتە رێزی‮ ‬تیپەكە،‮ ‬بۆیە ئەم وەرزە هیچ كێشەیەكی‮ ‬ئەوتۆمان نییە لەپێكهاتەی‮ ‬تیپەكە كەجێی‮ ‬باسكردن بێت‮.‬

هەر لەدرێژەی‮ ‬قسەكانیدا ئەو راهێنەرە هێمای‮ ‬بۆ ئەوە كرد‮ : ‬زۆر سوپاسی‮ ‬سەرجەم ئەندامانی‮ ‬یانەی‮ ‬ئافرەتانی‮ ‬هەولێر دەكەم كەبەهەموو شێوەیەك درێغیان لەپاڵپشتی‮ ‬و هاوكاری‮ ‬تیپەكەمان نەكردووە،‮ ‬بەتایبەتی‮ ‬بەرێز خاتوو ست كافیە كەزۆر بەجددی‮ ‬لەگەڵ تیپەكەمان ماندوو و بەردەوامە‮ ‬

 
چاپکردن   Share گه‌ڕانه‌وه‌