2017-10-29


فارس قادر فەقێ عەبدوڵڵا*

گەر بۆ مێژوو راستییەكان بنووسرێت و بگوترێت لەوەی بینراو بیسترا لە كەناڵە تەلەفزیۆنییەكان و دەزگەكانی راگەیاندنی خۆمان و بێلایەن و دژەكانمان یان دەتوانین بڵێین دوژمنەكانمان دوور لە چەواشە و تەرەفگیری سەیری بابەتەكان بكەین بە راستی مرۆڤ تووشی شۆك دەبێت لە نێوان دوو هەڵوێست و دوو جەمسەری لە یەكتر دوور لە لایەنی ناهاوسەنگی تەرازووی دوو هێز یان بیركردنەوە و هەڵسوكەوتكردن دژ بە یەكتر كە ئەمیشیان دەتوانین بەمشێوەیە شیبكەینەوە و لێكبدەینەوە، جەمسەرێك كە كوردە خۆی تەنیایە و تەنها پشتئەستورە بە ئیرادە و هێز و بیروباوەڕی گەل و نیشتمان و لە سەرەتاوە هیچ بەرچاو روونیەكی نییە و تەنها بڕیاردان نەبێت، بۆیە بەرخودان و بەرەنگاریكردن لە ماف و بیرو باوەڕی گەلەكەی كەچی بەرامبەرەكەی وەك دوژمنێك وایە لەگەڵ ئەوەی بەر لە ماوەیەكی كورت هاوبەش و هاوسەنگەری كورد بوو لە شەڕی داعش ئێستا ئەوپەڕی دژایەتی كوردی كردووە بە ئامانج و دروشمی خۆی، خۆی خستۆتە سەنگەری داعش بەرامبەر بە كورد و بگرە لە داعش پیستر و خراپتر رەفتار دەكات لەگەڵ كورد كە ئەمەش بە فیت و هاوكاری و پاڵپشتی راستەوخۆی ئێران و گرووپە تیرۆریستەكانی ئێران و هەماهەنگی توركیایە بۆ دوژمن داری كورد.
كەواتە ناهاوسەنگییەكی زۆر گەورە هەیە لەنێوان كورد و بەناو حكوومەتی عێراق كەراستییەكەی ئەوەیە كە بڵێن بەرامبەر بە (كوردی باشوور و دەوڵەتی ئێران و توركیا) كە ئەمەش نەك هاوسەنگ نییە، بەڵكو عەقڵ قبووڵی ناكات، ئاشكرایە ئەوەی ماوە لە دەست كورد تەنها بیروبڕوایەوە هەر ئەم قەناعەتەیە كە بووە بە چەكی شانی كورد دژ بە ئێران و هاوسەنگەر و بە كرێگیراوەكانیان لەناو عێراق ئەمە لە لایەنی سەربازی گەر تەماشای لایەنی سیاسیش بكەین دەبینین شەڕی كورد دژ بە 3 دەوڵەتە وەك (عێراق، توركیا، ئێران) لە هەموو بوارەكان وەك شەڕی دیبلۆماسی و هەروەها هەمووكات سەركردە و سەرۆكی هەرسێ وڵات بەیەكەوەن و لەسەرخەتن، لەگەڵ یەكن بۆ دژایەتی كوردستان و لە شەڕی راگەیاندن، هەر سێ وڵات هەموو هێز و توانای راگەیاندنی خۆیان خستۆتە گەڕ بۆ شەڕی كورد و لە شەڕی ئابووری رۆژانە بە دوای پلانی نوێ دەگەڕێن بۆ لێدانی ژێرخانی كوردستان و بڕینی هەموو سەرچاوەی داهات و بڕینی هەموو رێگاكانی سنوور لەگەڵ كوردستان، كەواتە هیچ نەماوە نەیكەن لەگەڵ كورد و ئەو رێككەوتنەی دژ بە بە گیانی كورد كراوە لە نێوان ئەم سێ وڵاتە بێشك دژ بە (داعش)ی تیرۆریست نەكراوە كەواتە گەر سەیر بكەین لە حساباتی ئەم سێ وڵاتە كورد خەتەرترە لە تیرۆر و لە داعش، بەڵام پێچەوانەكەی راستە دەركەوت كە داعش و حەشد هەموو گرووپێكی تری تیرۆریستان دروستكراوی دەستی ئەم چەند دەوڵەتەن وەك (ئێران، توركیا، سووریا، عێراق) هەر ئەوانیش ئەم فەرخە گورگانەیان دروستكردووە بۆ گیانی ئێمە لە ئەنجامدا لە دەستیان دەرچوو، چونكە هەموویان یەك هەدەفیان هەیە، گەر سەیری كارەكانیان بكەین رەنگە لە هەندێك حاڵەت داعشەكان و بە قەدەر حەشد و پاسدار و ئەوانی تر بە بەرنامە كاریان نەكردبێت بەرامبەر بە دژایەتی ناسنامەی كوردی و نەژادیەوە.
 لە كاولكاری و لە هەتكی نامووس و لە فەرهودكردنی كوردستان، زۆرجار گوێمان لێبووە داعشەكان هاتوون پیاوەكانیان كوشتووین یان بە ناوی تۆبە عەفویان كردوون و ئافرەتە گەنجەكانیان بردوون، بەڵام لە هەندێك شوێن ماڵیان نەسووتاندووە و خانوویان نەڕووخاندووە، كەچی حەشد و پاسدار بەر لە هەموو شتێك خانوویان تەقاندەوە هەتكی نامووسی خەڵكیان كرد لە خورماتوو تا ئێستا 300 خانووی هاووڵاتییانی كوردیان سوتاندووە و تەقاندووەتەوە لە هەمووشی بەدڕەوشتی تر بۆ گاڵتەكردن بە شعوری 50 ملیۆن كورد بە سەدان ئاڵای كوردستانیان سووتاند و دڕاند و بێ كەرامەتیان كرد بەرامبەر بە مقەدەساتی ئەم میللەتە و رەسمیشیان گرت و لە تۆڕە كۆمەلاتییەكان بڵاویان كردەووە.
 بەڵێ داعشی وەحشی سەربڕ وەك ئێوەی نەكرد، بەمشێوەیە ئیهانەی كوردی نەكرد، بەڵام كوردیان كوشت ئەمە لە لایەك لە لایەكی تر ئێمەش هیچ نەما بە داعش نەكەین، سەدقات تۆڵەی خۆمان كردووەتەوە لە داعش ئەگەرچی نزیكەی 2000 شەهیدمان هەیە رەنگە دوو بەقەدەر ئەو ژمارەش خەڵكی بێ گوناهی كورد بە دەستی داعش كوژرابێت، بەڵام ئێمە بە دەیان قات زیاتر تۆڵەمان لێیان كردووەتەوە، دوایی ئەوان تیرۆریستن، دەوڵەت نین، لە دەرەوەی یاسان هەموو جیهان دژیانە، چی كردیان كردیان، تەواو ناوی خۆیان لەگەڵ خۆیانە، بەڵام كارەسات ئەوەیە شیعە و بەناو حەشدی هاوسەنگەرمان و پاسداری بەناو خاوەن وڵات و حەزارەت بۆ ئەم دەردەمان پێ دەكەن، ئەم هەمەجەنانە بۆ لە داعش پیستر دەرچوون؟ تەنها لەبەر ئەوەی كوردین! بە داخەوە هەرچییەك بین، ئێمە عێراقمان پاراست، ئێمە عێراقمان دروستكرد، چونكە ئێمە لە ژیان و شارستانییەتی تێدەگەین، بەڵام بە داخەوە هەڵەمان كرد بۆ ئێوەی بێ وەفا و بێ نمەك.
هەموو دونیا دەزانێت شیعە و حەشد بە خوێنی ئێمە و لەسەر پشتی ئێمە بوون بەو پیاوە و خۆشیان دەزانن، بەڵام داخەكەم حەرامزادە و نامەرد دەرچوون، دیارە ئەم قسەیە وایە لای ئەوان كورد، هەر كوردە، بۆیە دەبێ ئێمەش تێبگەین (حەشد، بەعس، داعش) هەمووی یەكە و یەك ئەخلاقە لەوەش گرنگتر (عێراق، ئێران، توركیا، سووریا) یەك عەقڵییەتن گرنگ نییە، شا رۆیی، ئایەتولا هات، سەددام رۆیی، عەبادی هات، یان ئەتا تورك تەواو، ئەردۆغان هات، دیارە هەمووی نەگۆڕە بۆ كورد بۆ خۆشیان جیاش بێت، بۆ ئێمە سوودی نییە دەبێ ئێمەش نەگۆڕبین و تێبگەین، بەسەر لەژێر چەپەلۆكی ئەوان بین و پێیان بێڵین ئێمە شانازیش دەكەین، ئێمە وەك ئێوە نین، ئێوە ئاڵامان دەسووتێنن لەژێر ئاڵای پاسدارانی ئێرانی ئەمە كاری ترسنۆكانەو ئازایەتی خۆتان نییە.
خانوومان دەڕووخێنن بە دەبابەی ئەمەریكی و وڵاتمان داگیردەكەن، بەهاوكاری هاوپەیمانی ئیقلیمی فشەفش دەكەن، ئەمەش روو رەشییە. لە یادتان چوو؟ ئێمە دەیان ساڵە ئاوارەكانتان دەحەوێنینەوە و هاوكاریتان دەكەین و مەڕوماڵاتان لەوەڕگاكانی كوردستان پەروەردە دەكرێن، نامووستان دەپارێزن، كوردستان شوێنی پاراستنی دەنگە جیاوازەكانتان بوو، شەرمتان نەكرد لەژێر سێبەری دەبابەی ئێرانی كاولتان كرد، بێحورمەتی و بێ ئەدەبیتان بەرامبەر بە ئاڵاكەی كوردستان كرد.
سەیركەن غیرەتی ئێمە لەگەل غیرەتی ئێوە چەند جیایە، كوڕە كوردێكی كەركووكی بە ناوی كاكە (محەمەد) بە رووناكی رۆژ لەبەرچاوی هەموو جیهان لەژێر چەتری دۆستەكانتان بە حزوری هەرسێ دەوڵەت لە شاری كوردان لەشاری مەردان لەسەر سەیارەی پۆلیسی ئێوەی داگیركەر لەبن سێبەری چەكی دۆشكە و بیكەیسییەكەتان، خۆی تەنها بە كراسێكی بەری وەڵامی ئێوەی داوە گوتی نامەردینە ئەوەی بێ حورمەتی بەرامبەر بە ئاڵای كوردستان بكات تۆڵەی لێدەكەمەوە، تۆڵە بە سەبرە ئەما بە زەبرە ئاڵاكەتانی لە ژێر پێ ناو تەنها كەسێك بوو هەر بە تەنیا و هەر ئیرادەی خۆی بوو، بەڵام وەك ئێوە نامەرد نەبوو، لە پەنای پاسدار تۆڵە بكاتەوە و لە مردن نەترسا، حسبای بۆ ئێوەش نەكرد، بۆیە مێژووی بۆ خۆی و بۆ گەلەكەی تۆماركرد، ئێوەش تەنها مێژووێكی رەشتان بۆ خۆتان زیاد كرد، مێژوو نامەردی ئێوەش دەنووسێت، فیداكاری محەمەدی كەركووكیش دەنوسێت جیاوازییەكەی ئەوەیە بۆ نەوەكانی ئێمەی كورد شانازییە و بۆ ئێوەش سەر شۆڕی.
*ئەندامی ئەنجوومەنی سەركردایەتی پارێزگای هەولێر (پ. د. ك)

 
چاپکردن   Share گه‌ڕانه‌وه‌