2017-10-29

ڕەوان ئیدریس بارزانی

ئێستا كە گەل و وڵاتەكەمان بە دۆخێكی ناخۆشدا تێدەپەڕێت، پرسیاری بەشێكی زۆری ئازیزان ئەوەیە، بۆ وامان بەسەر هات و ئایندەمان چۆن دەبێت؟
پێش هەموو شتێك پێویستە ئەوە لای هەموومان ڕوون بێت كە ئەم دۆخە كاردانەوەیەكی كتوپڕی دەسەڵاتدارانی بەغدا، بە پشتیوانیی دراوسێكانمان نییە. بەڵكوو چەند ساڵێكە دەسەڵاتدارانی بەغدا پشتیان كردۆتە شەراكەت تەوافوق و دەستووریان پێشێل كردووە و دەستیان كردووە بە ئازاردانی گەلەكەمان تا گەیاندیانە بڕینی قووتی خەڵكی كوردستان و ئامانجیشیان ئەوە بوو دوای كۆتاییهاتنی شەڕی داعش، ئەم دۆخەی ئێستا بخوڵقێنن. ڕەنگە بپرسن، ئەگەر وایە بۆچی هەرێمی كوردستان هیچ ئامادەكارییەكی نەكرد بۆ ئەوەی ڕێگە لەم دۆخە بگرێت؟
ئەگەر ئێوەی بەڕێز سەیرێكی وتار و پەیامەكانی بەڕێز جەنابی سەرۆك بارزانی بكەن لەكۆبوونەوە جەماوەرییەكانی بانگەشەی ڕیفراندۆمی سەربەخۆیی، دەبینن چەندینجار بەڕێزیان تەئكید دەكاتەوە كە دەسەڵاتدارانی بەغدا هیچ باوەڕیان بە شەراكەت و فیدڕاڵی نەماوە و ئەوان ئێمەیان تەنها وەك نەتەوەی ژێر دەست دەوێت و ئێمەش ژێردەستی قبوڵ ناكەین. بەڕێزیان هەروەها تەئكیدی دەكردەوە كە ئەوان دەیانەوێ لە دوای شەڕی داعش پەلاماری كوردستان بدەن و بمانگەڕێننەوە بۆ هێڵی سەوز كە لە دوای ڕاپەڕینەوە تا ڕووخانی ڕژێمی سەدام لە 2003، خەتی تەماسی پێشمەرگە و سوپای بەعس بووە. سەرۆك بارزانی پێشتریش لە كۆبوونەوە فەرمییەكانیشیدا ئەوەی بە ڕوونی بە لایەنە سیاسییەكان و سەرجەم شاندە دیپلۆماتییەكان گوتووە و باش نیەتی ئەوانی خوێندبۆوە، هەربۆیە بڕیاری ئەنجامدانی ڕیفراندۆم كارێكی زۆر پێویست بوو تا لەو دۆخەدا كە دەرفەت و توانامان هەیە دەنگی ڕەوای گەلی كوردستان لە سەرجەم هەرێمی كوردستان و ناوچە كوردستانییەكانی دەروەی ئیدارەی هەرێمیش بگاتە ویژدانی دنیای ئازاد و وەك بەڵگەنامەیەكی زیندوو لەبەر دەستیان بێت و بزانن گەلی ئێمە سەربەخۆیی دەوێت.
لەبارەی ئەوەی كە بۆچی دۆخەكە بەمشێوەیە گۆڕا، دەبێ بەڕاشكاوی بڵێم كە سەركردایەتیی سیاسیی كوردستان حیسابی هەموو پێشهاتەكانی كردبوو جگە لەو ناپاكییەی لەناوخۆدا كرا و ڕێگەی بۆ هێزەكانی عێراق خۆش كرد بەئاسانی بگەنە ناو كەركووك و پشت لە هێزی پێشمەرگە بگرن. لەبەر ئەوەی بە ڕوونییش دیار بوو كە پیلانێك لە ئارادایە بۆ نەهێشتنی یەكڕیزیی گەلەكەمان و پارچەكردنی كوردستان و هەڵگیرسانی شەڕی ناوخۆ، قوربانیمان دا و ڕێگە نەدرا ئەو مەرامەی دوژمنان بێتەدی. پێشمەرگە قارەمانەكانمان لە سەنگەری بەرگرییدان و لە داستانەكانی چەند ڕۆژی ڕابردوودا سەلماندیان كە ئیرادەی ئازادیخوازی و وڵاتپارێزیمان بەسەر گەلەكۆمەكی و چەكی پێشكەوتووی داگیركەردا سەردەكەوێت.
ئێستاش كە ئەو گەلەكۆمەكییەی دەوڵەتانی دراوسێ لەسەر كوردستان هەیە، ئێوەی ئازیز نیگەرانن لەوەی كە بۆچی كۆمەڵگەی نێودەوڵەتی پاڵپشتیی لە كوردستان ناكات و ئایا لەبیریان چووە كە لە شەڕی دژی داعش ئێمەیان بە پارێزەری ئازادی دەناساند؟ ڕاستییەكە ئەوەیە كە كۆمەڵگەی نێودەوڵەتی زۆر باش لە گرینگیی ڕۆڵی كوردستان تێدەگەن، لە چەند ڕۆژی ڕابردوویشدا چەندجارێك دڵنیاییان داوە كە پشتیان لە كورد نەكردووە، بەردەوامیش لەسەر خەت بوونە بۆ ئەوەی ڕێگە لە شەڕ بگیرێت و هەولێر و بەغدا لەسەر مێزی دانوستان كۆببنەوە. هەروەها ئەمەریكا بە ئاشكرا بە عێراقی ڕاگەیاندووە كە كۆنتڕۆڵكردنی ناوچەكێشە لەسەرەكان بە هێزی سەربازی، ناسنامەی ئەو ناوچانە ناگۆڕێت و پێویستە بە پێی دەستوور مامەڵە لەگەڵ ئەو ناوچانە بكرێت.
پێشنیاری حكوومەتی هەرێمی كوردستان، بۆ سڕ كردنی ئەنجامی ڕیفراندۆم، لەلایەن زۆربەی ئەو دەوڵەتانەوە پێشوازی لێ كراوە و هانی بەغدایان داوە ئەو پێشنیارە قبوڵ بكات و دەست بكرێت بە گفتوگۆ. هیوادارین كێشەكان بە گفتوگۆ چارەسەر بكرێن. ڕەنگە كۆتایینەهاتنی شەڕ دژی تیرۆریستانی داعش و هەوڵی كۆمەڵگەی نێودەوڵەتی بۆ كەمكردنەوەی نفوزی كۆماری ئیسلامیی ئێران لەناوچەكە بەگشتی و عێراق بەتایبەتی، هۆكارێك بن بۆ ئەوەی دەوڵەتان پشتیوانیی ڕیفراندۆمی سەربەخۆییان نەكرد و لەگەڵ مانەوی سیادەی دەوڵەتی عێراق بوون، بەڵام دڵنیا بن ئەم دۆخە دەگۆڕێت.
هاووڵاتییانی سەربەرزی كوردستان:
دەزانین ڕۆژانێكی سەختتان بەڕێ كردووە. ئەم خۆڕاگرییەتان مایەی شانازیی ئێمەی پێشمەرگەیە. ئێمەی پێشمەرگەی كوردستان بە ورەی پۆڵایینەوە خاك و كەرامەتی گەلەكەمان دەپارێزین. گەلەكەمان مێژوویەكی درێژی لەگەڵ قوربانیدان و كارەساتی ناخۆشدا هەیە و لەژێر هیچ گوشارێكدا ئیرادەی نەشكاوە و لە بەرانبەر زوڵم و داگیركاریدا چۆكی دانەداوە. دڵنیاتان دەكەمەوە، ئەم دۆخەی ئێستاش كاتییە و كوردستان بە سەربەرزییەوە ئەم ناخۆشییە تێدەپەڕێنێت.

هەزاران سڵاو بۆ گیانی پاكی شەهیدان و كەسوكاری سەربەرزیان
سڵاو لە پێشمەرگە گیانلەسەردەستەكانی كوردستان

 
چاپکردن   Share گه‌ڕانه‌وه‌