2017-11-06

گوتەبێژی ئەنجومەنی سەرکردایەتیی پارتی دیموکراتی کوردستان لە کەرکووک-گەرمیان ڕای دەگەیەنێت، حەشدی شەعبی لە کەرکووک دەستی بە دوو پرۆسەی مەترسیدار لەسەر ئایندەی کورد، کردووە.

عەدنان کەرکووکی، گوتەبێژی ئەنجوومەنی سەرکردایەتیی کەرکووک-گەرمیانی پارتی بە (باسنیوز)ی ڕاگەیاندوه‌، خەڵکی عەرەبی شیعەمەزهەب بە کۆمەڵ لە شارەکانی باشووری عێراق دەهێندرێنە کەرکووک.
عەدنان کەرکووکی هەروەها رایگەیاند، ئەو عەرەبە هاوردانەی لە چوارچێوەی ماددەی 140ـی دەستوور قەرەبوو کرانەوە و گەڕانەوە ناوچەکانی خۆیان، ئێستا بەشی زۆریان جارێکی دیکە گەڕاونەتەوە کەرکووک.

گوتەبێژی ئەنجومەنی سەرکردایەتیی کەرکووک-گەرمیانی پارتی هەروەها رایگەیاند، حکوومەتی عێراق لەڕێی میلیشیاکانی حەشدی شەعبی دەستی بە دوو پرۆسە دژی گەلی کورد لە کەرکووک کردووە، کە بەریتین لە بەعەرەبکردن و بەشیعەکردن.

بەرەبەیانی رۆژی دووشەممە 16/10/2017، سوپای عێراق، میلیشیاکانی حەشدی شەعبی و حزبوڵڵای لوبنانی بە سەرپەرشتیی و بەشداریی سوپای پاسدارانی ئێران هێرشیان کردە سەر خورماتوو، کەرکووک و ناوچە کوردستانییەکانی ئەو سنوورە و داگیریان کردن و بەپێی راپۆرتی نەتەوە یەکگرتووەکان، بەهۆی ئەو داگیرکارییەوە نزیکەی 200 هەزار هاووڵاتیی ئاوارەی هەولێر و شارەکانی دیکەی کوردستان بوون.

رۆژی چوارشەممە 18/10/2017، کۆسرەت رەسوڵ، جێگری سکرتێری گشتیی یەکێتی لە پەیامێکدا رایگەیاند، کە چەند “کاڵفام”ێکی ناو حزبەکەی ئەو پیلانەیان لە دژی گەلی کوردستان جێبەجێ کرد و رایگەیاند، “ئۆباڵی کارەساتەکانی کەرکوک و ھەموو زیانە گیانی و مادی و مەعنەویەکانی تری گەلەکەمان ئەکەوێتە ئەستۆی ئەو کاڵفامانەی ناو یەکێتی”.

حەشدی شەعبی لە نزیکەی 67 میلیشیای شیعەمەزهەبی عێراقی پێک دێت. بە فەتوای ئایەتوڵڵا عەلی سیستانی، مەرجەعی باڵای شیعەکانی عێراق دوای هەرەس پێهێنانی سوپای عێراق لە مانگی حوزەیرانی2014 لەلایەن چەکدارانی رێکخراوی تیرۆریستی داعش، دروست بووە.

 
چاپکردن   Share گه‌ڕانه‌وه‌