2017-11-09

  ئەندامێكی لیژنەی ئابووری و وەبەرھێنان لە پەرلەمانی عێراق دەڵێت، بڕیاری بانكی ناوەندی بۆ راگرتنی مامەڵەی بانكەكان لەگەڵ ھەرێمی كوردستاندا، سیاسییە و زیانی زۆر بەر بانكەكان دەكەوێت، بۆیە ناڕەزایەتییان پێشان داوە و بەو بڕیارە رازی نین.

بانكی ناوەندی لەسەر داوای پەرلەمانی عێراق، لە نووسراوێكدا داوای لە ھەموو بانكەكان كردووە، كە مامەڵەكردن لەگەڵ ھەرێمی كوردستاندا بە ھەموو شێوەیەك رابگرن، ئەمەیش وەك شارەزایانی ئابووری باسی دەكەن، زیانی زۆر بە عێراق دەگەیێنێت.

لەو بارەیەوە، ئەندامی لیژنەی ئابووری و وەبەرھێنان لە پەرلەمانی عێراق (نەجیبە نەجیب)، بە ماڵپەری فەرمیی پارتی دیموكراتی كوردستانی راگەیاند، "ئەو بڕیارە لە چوارچێوەی ئەو بڕیارانەیە كە دژی ھەرێمی كوردستان وەكو سزا دراون، بەڵام ئەمە بڕیارێكی خراپە و تەنیا زیان بەر ھەرێمی كوردستان ناكەوێت، بەڵكوو زیانی زۆر بە ئەوانیش دەگەیێنێت، بە تایبەت كۆمپانیا عێراقییەكان، لەوانە كۆمپانیای (مەسرەف تیجاری) وەبەرھێنانیان لە ھەرێم زۆرە، بۆیە ئەوان سوودی زۆر لە ھەرێم وەردەگرن و خەڵكیش متمانەی زۆری بە بانكەكان ھەیە".

ئەو پەرلەمانتارە ڕوونیشی كردەوە، بانكی ناوەندی پێویستە دوور بێت لە سیاسەت و سەربەخۆ مامەڵە بكات، چونكە ئەو داواكارییەی پەرلەمان بۆ مەرامی سیاسییە و بڕیارەكەی بانكی ناوەندییش سیاسییە، بۆیە ئەوەی بانكی ناوەندی كردوویەتی كارێكی خراپە و بە ھیچ شێوەیەك لە جێی خۆیدا نییە.

(نەجیب) گوتیشی، جێبەجێكردنی ئەو بڕیارە درێژە ناكێشێت، چونكە ئەنجوومەنی ئیداریی بانكەكان رازی نین، لەبەر ئەوەی زیانی زۆریان بەر دەكەوێت، بۆیە لە ماوەیەكی كەمدا ھەڵدەوەشێتەوە.

 
چاپکردن   Share گه‌ڕانه‌وه‌