2017-12-19

كاروان محەمەد

لای هەموو خەڵكی كوردستان ئاشكرایە كە ئۆپەراسیۆنە خیانەتكارییەكەی (16ـی ئۆكتۆبەر) لە لایەن تاقمێكی نێو حزبێكی سیاسی ناوخۆی كوردستان ئەنجام درا. ئەگەر بەدواداچوونێكی خێرای ئەم خیانەتكاریەی (16ـی ئۆكتۆبەر) بكەین دەبینین وێرای دەسكەوتی تاكە كەسی و قۆڕغكردنی خودی ئەو حزبە و خۆسەپاندن بەسەر جومگە عەسكەری و دارایی و رێكخستن و راگەیاندنی ئەو حزبە، هەروەها ئەم ئۆپەراسیۆنە(16ـی ئۆكتۆبەر) خواست و ئامانجێكی مێژینەی رژێمی ئیران بووە كە بەوەكالەت تاقمێكی خیانەتكاری نێو ئەو حزبە سیاسیەی ناوخۆی كوردستان ئەنجامیدا.

خیانەكاری (16ـی ئۆكتۆبەر) و پاكستان؟!
خیانەت كاری (16ـی ئۆكتۆبەر) كە خواست و ئامانجی ئێران بوو بۆ سەپاندنی هەژموونی خۆی لە كوردستان، وانەبێ لە ئەگەری ئەنجامدانی ریفراندۆمی سەربەخۆی كوردستان و چاوی كاڵی عێراق و یەكپارچەی عێراق بوو بێت!، هەروەك تاقمی خیانەتكار و حكومەتی عێراق دەیخەنەروو، بەڵكو پیلانێكی مێژینەی ئیران بووە لەپێناو رێخۆشكردن و فەراهەمكردنی رێگای وشكانی نێوان تەهران ـ بەغدا ـ دیمەشق ـ بەیروت، كە ئیران بە دەریای سپی ناوەراست دەگەیێنێت، پڕۆژەی فەراهەم كردنی ئەم رێگایە و هەژموونی ئیران لە دەڤەرەكە لە میدیاكاندا بە (هیلالی شیعی) ناودەبرێت و لە رووی سیاسیەوە بە (شادەماری هەناردەكردنی شۆڕشی ئیسلامی ئیرانی) ناودەنرێ و لە لایەن پڕوپاگەندای ئیرانییەوە بە (گوشار و هەڕەشە بۆ ئیسرائیل) رادەگەینرێ. ئەم پڕۆسەی ئیران كە تاقمی خیانەكرای 16ـی ئۆكتۆبەر بە وەكالەت ئەنجامیاندا، هەر ناو و ناتۆرێكی هەبێت، بەڵام لە راستیدا تەنها یەك ئامانجی هەیە ئەویش رێكخستنی وڵات و رژێمە شیعە مەزهەبەكانە (ئیران ـ عێراق ـ سوریا ـ لوبنان) لە بەرەیەكی مەزهەبی تایفەگەریدا) بۆ دروستكردنی هاوپەیمانییكی سیاسی مەزهەبی جوگرافی كاریگەر لە جیۆپۆلۆتیكی رۆژهەڵاتی ناوەراست بەرامبەر سعودیا و بەرەی سوونە. ئەگینا هەرگیز ئیران بیرلەوە ناكاتەوە هێڕشی سەربازی یاخود موشەكی بكاتەسەر ئیسرائیل، بەڵكو سیاسەتی ستراتیجی و جیۆپۆڵۆتیكی ئیران رێكخستنی رژێمە شیعە مەزهەبەكانە لە بەرەیەكی یەكگرتووی شیعەگەریدا بە ئامانجی توكمەكردنی پێگەی خۆی لە نێوەندە نێودەڵەتییەكان بۆ مساوەمەكردن لە دانوستانە نێودەوڵەتییەكاندا لەسەر گەیشتن بە چەكی ئەتۆمی لە بەرامبەر (چەكی ئەتۆمی سوونە) واتا چەكی ئەتۆمی پاكستان، كە بە چەكی ئەتۆمی سوونە ناودەبرێ و سعودیا پاڵپشتی و خەرجی دارایی دەكات و زۆجار بە چەكی ئەتۆمی سعودیا ش ناو براوە. شایانی باسە پاكستان و سعودیا كە دوودەولەتی سوونە مەزهەبن، پەیوەندی عەقائیدی و ستراتیجی و هاوكاری لە بواری چەكی ئەتۆمییان هەبووە هەرلە هەفتاكانی سەدەی رابردوو لەسەر دەمی  (زولفەقار عەلی بۆتۆ و زیائەلحەق و نەوازشەریف) سەرۆك وەزیرانی پێشووی پاكستان و تاكۆ ئێستاش ئەو هەماهەنگی و هاوكارییان بەردەوامە.
هەردەم ئیران ترسی ئەوەی هەبووە (ئێستاش ئەو ترسەی هەیە) كەلە باشووری رۆژهەڵاتەوە (پاكستان) هێڕش بكرێتە سەری، نەك لە رۆژئاواوە (سعودیە ـ ئیسرائیل)، شایانی باسە هەركات ئیران هەرەشەی لە سعودیا كردبێ، لەبەرامبەردا پاكستان هەڕەشەی لە ئیران كردووە، لەبیرمانە پار (11ـی كانوونی دووەم 2016) كاتێك محەمەد بن سەلمان شازادە و شوێنگرەوەی شای سعودیە سەردانی پاكستانی كرد و چاوی كەوت بە نەواز شەریف سەرۆك وەزیرانی پاكستان و راحیل شەریف سوپا سالاری سوپای پاكستان، لەم دیدارەدا (بەپێی سەرچاوەكانی سعودیا) راحیل شەریف دڵنەوایی دایە شازادەی سعودیا و جەختی كرد "هەموو میللەت و هێزە سەربازییەكانی پاكستان رێگە بە هیچ لایەنێك نادەن هێمنی و ئارامی سعودیە بشێوێنن، هەرلایەنێك بیربكاتەوە كە دەست درێژی بكاتە سەر سعودییە، پێویستە بیر لە بەرپەچ دانەوەی پاكستان بكات". ئەمەش هەڕەشەیەكی ئەتۆمی راستەوخۆ بوو دژی ئیران.
هەروەك باسمان كرد، خیانەتكارییەكەی 16ـی ئۆكتۆبەر و پەلهاویشتنی ئیران رووە و (عێراق ـ سوریا ـ لوبنان ـ یەمەن) تەنها بۆ دروستكردنی سیاسەتی گوشار و مساوەمەی جیۆپولۆتیكییە بەرامبەر سعودیا و ئیسرائیل و توكمەكردنی پێگەی خۆیەتی لە نێوەندە نێودەوڵەتییەكان لە پێناو گەیشتن بە چەكی ئەتۆمی خۆی كە دەتوانین ناویبنێین (چەكی ئەتۆمی شیعە) بەرامبەر بە (چەكی ئەتۆمی سوونە ـ پاكستان)، ئەگینا هەرگیز ئیران نیازی نییە هێڕش بكاتە سەر سعودیە و ئیسرائیل.

كوردستان تەنها كۆسپیە بۆ خەونی ئیران
لەم سەروبەندەدا و لە پێناو داهێنانی پانتاییەكی بەرفراوانی جیۆپۆلۆتیكی شیعەگەرایی، هەڵبەت ئیران پێویستی بە رێگاوبان و هێڵی گەیاندن و هاتۆچۆ هەیە كە ئەو وڵاتانەی لەسەروە ناومان بردن بەیەكەوە بگەیێنێت. شاراوەش نییە كە ئەم هێڵە یاخود ئەم رێگایە دەكرێ بە دوو دەڤەری جوگرافی جیاوازدا تێپەرێت، یەكێكیان ل لە تەهرانەوە بۆ بەغدا ئینجا لە بەغداوە بۆ موسڵ و دێرەزۆر و بەرەو دیمەشق. دووەمیان لە بەغداوە بۆ هەولێر و لە هەولێرەوە بۆ موسڵ ئینجا بۆ دێرەزۆر  بەرەو دیمەش (كە ئیران ئەمەیانی پێ باشترە) لەبەر ئەوەی نزیكتر و ئارامترە. بەڵام لە هەردوو حاڵەتدا بەشێكی ئەم رێگایە دەبێت بە كوردستان و ناوچەكوردستانییەكانی دەرەوەی ئیدارەی هەرێمی كوردستاندا تێدەپەڕێت، بێگومان تاكو ئێستا ئیران لەو بەشەی بە كوردستان و دەرەوەی ئیدارەی كوردستاندا تێدەپەڕێت پشت راست نییە، چونكە ئیران هەژموونی بەسەر كوردستاندا نییە. هەروەها ئیران وای بەچاك دەزانێ كە هێڵەكە لە تەهرانەوە بەرەو دەروازەی حاجی ئۆمەران و بە هەوڵێردا تیپەڕیت و بەرەو موسڵ و رەبیعە ئینجا بەرەو دێرەزور و رووە دیمەشق (لەبەر ئەو هۆكارانەی باسمانكرد). بەڵام لە هەردوو حاڵەتی سەرەوە پێویستە ئێران هەژموون و دەسەڵاتی خۆی بەسەر كوردستاندا (نێوەندی بڕیار لەهەوڵێر) بسەپێنێت. ئێستاش پاش ئەوەی ئیران تەواو دەسەڵاتی خۆی بەسەر نێوەندی بڕیاری بەغدا سەپاند، مایەوە هەوڵێر كە دەسەڵاتی خۆی بەسەردا بگیرێت، بێگومان بەپێی عورف و یاسا و پرەنسیپە نێودەڵەتییەكان، ئیران بۆی نییە بەڵكو ئەو مافەی نییە هیچ بڕیارێك یاخود رێگەپێدانێك بەسەر كوردستاندا بسەپێنێت، هەروەها بەهەمان یاسا و پەرنسیپ بۆی نییە بەهێزی چەك و سوپای ئیرانی هێڕش بكاتە سەر كوردستان و داگیری بكات، مایەوە كە دەستەكانی خۆی نەسوتێنێت و (جاش و مەقاش) بەكاربێنێت بۆ ئەوەی وەكو بەیروت و بەغدا ناوەندی بڕیاری كوردستان (هەولێر) كۆنترۆڵ بكات، بۆیە پیڵانی خیانەت كاری (16ـی ئۆكتۆبەر)ی هۆندەوە و خستیە بەردەم تاقمێكی خیانەتكاری هەرزەكاری نێو حزبێكی سیاسی ناوخۆی كوردستان بۆ ئەوەی جێبەجێی بكات و ئەوكات ئیران لە نێو ئاوی ڵێڵدا راوی خۆی بكات. بەڵام لێزانی و لێهاتووی سەرۆك مەسعود بارزانی و قارەمانێتی و فیداكاری پێشمەرگە گیان لەسەردەستەكانی كوردستان رێگەیان نەدا ئەم پیلانە تاسەر ئەنجام بدرێ و فیتنەكە لە كەركوك گیرسایەوە و شەڕی براكوژی رووی نەدا، بەڵام لە سایەی سەری خائینی 16ـی ئوكتۆبەر كەركوك فرۆشرا. هیچ نهێنییەك نادركێنم ئەگەر بڵێم شەڕی براكوژی (1994ـ1996) هەمان پیلان و هاندانی ئیران بوو لەپێناو كۆنترۆل كردنی ناوەندی بڕیار لە هەولێر.
بەم شێوەیە كوردستان و سەركردایەتی نیشتمان پەروەری كوردستان تەنها كۆسپ و تەگەر و ئاستەنگن لە رێگای خەونی چەندین ساڵەی ئیران بۆ تەواوكردنی (هیلالی شیعی) و بونیاد نانی رێگای وشكانی (ئیران ـ عێراق ـ سوریا ـ لوبنان)، ئینجا بۆ هاتنە دی خەونی چەند ساڵەی خۆی ئیران پێویستی پاك كردنی ریگاكەیە و كاراكردنی ئەم هیلالە شیعیە و لابردنی كۆسپ و تەكەرەكانە، ئەمەش پێویست دەكات بە روخاندنی حكومەتی نیشتیمان پەروەری هەرێمی كوردستان.

روخاندنی  شەرعیەت و حكومەتی هەرێمی كوردستان
هەروەك پێشتر باسمانكرد ئیران مافی ئەوەی نییە بە هێزی سەربازی تەدەخولی حكومەتی كوردستان بكات، بۆیە پێویستی بە پیلانێكی دیكەی هەیە كە ببێتە تەواوكەری پیلانی خیانەتكاری 16ی ئۆكتۆبەر بۆ ئەوەی خەونەكەی ئیران بێتەدی، ئەویش پیلانی حكومەتی ئینقازی وەتەنی كوردستانە (حكومەتی كاتی كوردستان) كە هەمان تاقمی خیانەتكاری 16ـی ئۆكتۆبەر و تێقمێكی دیكەش بانگەشەی بۆ دەكەن.
هەروەك لەسەروە باسمان كرد، كە ئیران مافی ئەوەی نییە بەهێزی سەربازی حكومەتی كوردستان بروخێنێت، بۆیە دەبێت لەرێگای جاش و وەكیلەكانیەوە ئەم كارە ئەنجام بدات، ئینجا پاش ئەوەی هەوڵی یەكەمی ئیران (خیانەتكاری 16ـی ئۆكتۆبەر) بەتەواوی یاخود وەكو پێویست ئەنجامی خۆی نەپێكا، ئێستا ئیران لە هەوڵی دووەمدایە كە حكومەتی كوردستان بروخێنێت بەهاوكاری هەمان تاقمی خیانەتكاری (16ـی ئوكتۆبەر) و ئێستا تاقمێكی دیكەش هاتۆتە سەر خەتی وەكالەت و جاشایەتی و خۆفرۆشی و هەردوو تاقم بەنیازی جێ بەجێكردنی هەوڵی دووەمی پیلانی ئیرانن بۆ روخاندنی شەرعیەتی كوردستان و حكومەتی كوردستان لە ژێر ناوی پێكهێنانی حكومەتی كاتی (حكومەتی ئینقازی وەتەنی) لە كاتێكدا حكومەتی شەرعی ئێستای كوردستان تەنها حەوت مانگی ماوە كە بەشێوەیكی شەرعی و هەڵبژاردن حكومەتێكی نوێی كوردستان بونیاد بنرێ!. لێرەدا پرسیارێك دێتە پێشەوە لەوانەیە پرسیار خەڵكانێك بێت كە لە واقیعەكە نەگەیشتوون یاخود كەسانی سادەبن كە گرنگی نادەن بە ئەلف و بێی سیاسیەت. پرسیارەكەش ئەوەییە: "چۆن و بۆچی حكومەتی كاتی یاخود حكومەتی ئینقازی وەتەی، دەبێتە ئەگەری روخانی حكومەتی هەرێمی كوردستان و لەبار بردنی شەرعیەتی هەرێمی كوردستان لە نێو دەستوور و حكومەتی فیدڕاڵی عێراقدا"؟!.

قۆناغەكانی نەهێشتنی شەرعیەتی كوردستان
حكومەتی كاتی (حكومتی ئینقازی وەتەنی) كە دوو تاقمەكە بانگەشەی بۆ دەكەن، پیلانێكی گومانلێكراوی ئیرانە بۆ روخاندنی حكومەتی هەرێمی كوردستان و نەهێشتنی شەرعیەتی هەرێمە لە نێو دەستوری حكومەتی عێراقی فیدڕاڵ، ئەم پیلانە بە چەند قۆناغێكدا تێدەپەڕێت:
قۆناغی یەكەم: هەڵوەشاندنەوەی حكومەتی ئێستای كوردستان بە تەواوی دامودەزگاكانی كە شەرعیەتی پێكهێنانیان لە هەڵبژاردنەكانی 2013 وەرگرتووە.
قۆناغی دووەم: پێكهێنانی حكومەتێكی گوایە تەوافقی (ناشەرعی) لاسەنگ و ناسەقامگیر و لەرزۆك  كە كۆنترۆڵەكەی لە (تەهران)بێت، بۆ ئەوەی هەركاتێكی ئیران بخوازێ ئەو حكومەتە ئینتیقالییە (هەڵسوڕێنێ!) و یان بیروخێنێ وەكو حكومەتی ئیستا و پێشووی لوبنان كە بە سویچی حزبولڵای لوبنانی (وەكیلی ئیران) پێدەبێ و دەكوژێتەوە.
قۆناغی سێهەم: پاش دامەزراندنی حكومەتی كاتی كوردستان، بەپیلانی دارژراوی ئیران ئینجا كاردەكرێ بۆ نانەوەی ئاژاوە و ناكۆی نێوان لایەنە سیاسییەكانی كوردستان و لێكترازان و پەرتەوازەكردنی ناوماڵی كورد لەوەزیاتر كە ئیستا پەرتەوازەیە!، بۆ ئەوەی هەڵبژاردنەكانی پەرلەمانی كوردستان لە كاتە درێژراوەكەی خۆی (حوزەیرانی 2018) ئەنجام نەدرێ. بەم شێوەیە كوردستان دەكەوێتە نێو فەراغێكی شەرعی و سیاسی.
قۆناغی چوارەم: كە كوردستان كەوتە نێو فەراغی شەرعی و سیاسی، ئەوكات كێ و لەسەر چ بنەمایێك داهات و دارایی و ئابووری سەروەری كوردستان فەراهەم دەكات؟!، كێ و لەسەر چ بنەمایێك نوێنەرایەتی و ئیدارەی دیپلۆماسییەتی كوردستان دكات، كێ و لەسەر چ نبەمایێك  ستانەكانی نێوان هەولێر و بەغدا ئیدارە دەدات؟!.
قۆناغی پێنجەم: پاش ئەوەی كە كوردستان دەكەوێتە نێو فەراغی سیاسی و شەرعی، ئینجا تاقمی بەكرێگیراو و خیانەتكاری نێو یەك دوو حزبی سیاسی ناوخۆی كوردستان (هەروەك چەند ساڵی رابردوو) دەست دەكەنەوە بە كاری گێرە شێوێنی و تێكدان و ناسەقامگیری و ناسازانی نیشتیمانی و خۆپێشاندان و بەلارێدابردنی ئاراستەی خۆپێشاندانەكان بەرەو ئاتوون و جەهنەمی دووئیدارەیی و ناكۆكی ناوخۆی كوردستان، ئەوكات دوورنییە یاخود پێشبینی دەكرێت بە پاڵپشتی و هاندانی ئیران و توركیا دیسان شەڕی براكوژی بەرپابێتەوە.
بەم شێوەیە (پاش ئەم قوناغانەی لەسەرەوە باسمان كردن) كوردستان دەكەوێتە نێو دۆخێكی ئاڵۆز و نائارام و وەكو باسمان كرد، دوورنییە شەڕی نەگریسی براكوژی سەرهەڵداتەوە، ئەمەش رێخۆشكەر و بیانۆ دەبێت بۆ حكومەتی بەغدا (بە وەكالەت و پاڵپشتی ئیران و توركیا) بە ناوی دەستور و سەقامگیری عێراق و دەسەڵاتی فیدڕاڵی هێرش بكاتە سەر كوردستان و كیان و شەرعیەتی هەرێمی كوردستان لەناو ببات هەر ئەمەشە ئامانجی سەرەكی ئیران. لەم سەروبەندەدا و لەسایەی (حكومەتی كاتی ـ ئینقازی وەتەنی)، دۆستانی كوردستان كە ئێستا پشتگیری و پاڵپشتی حكوومەتی كوردستان دەكەن لە ئەنجامدانی گفتوگۆ لە گەڵ حكومەتی بەغدا لەسەر بنەمای جێبەجێ كردنی تەواوی دەستوور، ئەوكات ئەوانیش هیچ بنەمایەكی یاسایی و سیاسییان نامێنێت كە پاڵپشتی و هەماهەنگی هەرێمی كوردستان بكەن. بەم شێوەیە حكومەتی بەغدا پاساوی بەدەستەوە دەبێت كە وەكو پارێزگانی عێراق مامەڵە لەگەڵ هەرێمی كوردستان بكەن. بەم شێوەیە ئەزموونی كوردستان و سەروەری كوردستان لەناو دەبرێت و پڕۆژەكەی ئیران سەردەكەوێت و رێگای (ئیران ـ عێراق ـ سوریا ـ لوبنان) بۆ ئیران مەیسەر و پاوان دەبێت و لە لایەكی دیكەش كیانی كوردستان لەناو دەبرێت.

پێویستە هەڵبژاردنەكانی كوردستان لە كاتی خۆیدا ئەنجام بدرێت
لەم بارودۆخەدا پێویستە هەموو خەڵكی كوردستان بە هەموو نەتەوە و ئاین و ئاینزاكانەوە و تەواوی جەماوەری نیشتیمان پەروەری هەموو حزب و لایەنە سیاسییەكانی كوردستان، نەكەونە نێو تەڵە و پیلانی داگیركەرانی كوردستان و پێویستە پڕۆژەی (حكومەتی كاتی ـ ئینقازی وەتەنی) رەت بكەنەووە كە تاقمە خیانەتكارەكانی 16ـی ئۆكتۆبەر و لایەنێكی گومانلێكراو بانگەشەی بۆ دەكەن. چونكە ئەمە پڕۆژەیەكە لەپێناو لەناوبردنی كیانی شەرعی هەرێمی كوردستانە بەتەواوەتی. بۆیە دەبێت حكومەتی هەرێمی كوردستان هەرلەئێستاوە چاكسازی و ئامادەكاری بكات بۆ ئەنجامدانی هەڵبژاردنەكانی پەرلەمانی كوردستان لەكاتی خۆیدا، بەڵكو پێش تەواوبوونی وادەی درێژكراوەی ئێستای پەرلەمان و حكومەت، لەپێناو پێكهێنانی حكومەتی نوێی كوردستان لەسەر بنەمای ئەنجامەكانی هەڵبژاردن، هەروەها بەئاگابێت لە پیلانەكانی جاش و خۆفرۆش و داگیركەرانی كوردستان لەم ماوەیەدا. لەوباروەڕەدام بە هیمەتی سەركردایەتی سیاسی كوردستان و حزب و لایەن و جەماوەری نیشتیمان پەروەری كوردستا، كەلەم ماوەكورتەی (6مانگ) كەماوە لە تەمەنی پەرلەمان و حكومەتی كوردستان، بەرەی خائین و خۆفرۆشتان ناتوانن پڕۆژەكەی ئیران جێ بەجێ بكەن؟!، بەڵام حكومەتی كوردستان و سەركردایەتی سیاسی پێشبینی ئەوەبكەن كە تاقمی خائین و خۆفرۆشان بە پاڵپشتی و هاوكاری ئیران هەوڵ دەدەن كۆسپ و تەگەرە بخەنە بەردەم ئەنجامدانی هەڵبژاردنەكانی پەرلەمانی كوردستان. ئینجا پێویستە هەرلەئێستاوە رێكار و میكانزمی ئەنجامدانی هەڵبژاردنەكان بگرێنە بەر و وریا و ئاگادار و لە ئامادەباشیدابن.

 
چاپکردن   Share گه‌ڕانه‌وه‌