2017-12-21

نێچیرڤان بارزانی رایگەیاند "موئامەرەی سەر کوردستان زۆر لەوە گەورەترە کە هەستیپێدەکرێت و خەڵکیش هەیە پاڵپشتی دروستکردنی ئاژاوە دەکات". دەشڵێت، لە داوای خەڵک بۆ بژێوی ژیانی تێدەگەن و مافێکی سرووشتییە، بەڵام دەستێک هەیە دەیەوێ دۆخی کوردستان تێکبدات، بەرپرسیارێتی حکومەتیشە ئارامی و ئاسایشی خەڵکی کوردستان بپارێزێت.

لە کۆنگرەیەکی رۆژنامەڤانیدا دوای کۆبوونەوەی ئەنجوومەنی وەزیران، نێچیرڤان بارزانی باسی سەردانەکەی ئەڵمانیای کرد و گوتی "سوپاسی هاوکارییەکانی ئەڵمانیا دەکەین لەڕووی مرۆیی و سەربازییەوە کە هاوکاری زۆر کوردستانی کردووە".

نێچیرڤان بارزانی گوتیشی "ئەڵمانیا بە هاوبەشی لەگەڵ فەرەنسا دەیانەوێ یارمەتیدەری هەرێمی کوردستان بن بۆ چارەسەری کێشەکان لە چوارچێوەی دەستووری عێراقدا. ئێمەش جەختمانکردەوە کە پابەندین بە دەستووری عێراق و رێز لە بە بڕیارەکانی دادگای فیدراڵی دەگرین".

لەبارەی خۆپیشاندان و ئاڵۆزییەکانی سنووری سلێمانی و هەڵەبجە، نێچیرڤان بارزانی رایگەیاند "سەرەخۆشی دەکەین لە ماڵباتی ئەو کەسانەی گیانیان لەستداوە و هیوای چاکبوونەوە بۆ برینداران دەخوازین".

سەرۆکوەزیران نێچیرڤان بارزانی رایگەیاند "خۆپیشاندانی ئاشتییانە و مەدەنی مافی سرووشتی خەڵکە، لە داوای خەڵک تێدەگەین بۆ بژێوی ژیانی، بەڵام دروستکردنی ئاژاوە مانای خۆپیشاندان نییە. دەستێکی تێکدەر هەیە بۆ بەلاڕێدابردنی خۆپیشاندانی مەدەنی، ئێمە دەزانین تەحریک هەیە و خەڵک هەیە پاڵپشتی دروستکردنی ئاژاوە دەکات، بەڵام هێزە ئەمنییەکان و گەلی کوردستانیش دژی ئاژاوەن و رێگەنادەن ئاسایشی کوردستان تێکبچێت".

نێچیرڤان بارزانی دەشڵێت "پێویستمان بە یەکڕیزییە چونکە لەبەردەم تەهدیدی جددین. دەبێ یەکڕیز بین، ئەگەر یەکڕین نەبین ئەوا کەس فریامان ناکەوێ خۆمان نەبێت، موئامەرەی سەر کوردستان زۆر لەوە گەورەترە کە هەستیپێدەکرێت".

لەبارەی دۆخی ئابووری کوردستان دەڵێت "داوای خەڵک بۆ بژێوی ژیانی حەقە، بەڵام  دوای رووداوەکانی ئەوم دواییە داهاتی کوردستان بۆ نیوە کەمبووەتەوە. لەگەڵ ئەوەشدا رێگە هەیە بۆ ئەوەی لە ئایندەدا لەم دۆخە ناخۆشە دەربچین".

نێچیرڤان بارزانی ئاماژەی بەوەشکرد "لەگەڵ پەرلەمان کۆبووینەتەوە و کۆمیتەیەکی هاوبەشمان دەبێ لەبارەی پڕۆژەکانی چاکسازی. ئێستا چەندین پڕۆژەی چاکسازیمان ئامادەکردووە و لە پەرلەمان گفتوگۆی لەبارەوە دەکرێت".

نێچیرڤان بارزانی رایگەیاند "داوامکردووە رۆژی هەڵبژاردن دیاریبکرێ کە لە سێ مانگ تێپەڕنەبێت". دەشڵێت بیانووی هەندێک لایەن لەبارەی لیستی دەنگدەران بیانووە بۆ دواخستنی هەڵبژاردن، ئەگەرنا "ئەگەر قسە لەسەر ناوی مردوو بێ، خۆ تەنیا خەڵک لە پارتی نەمردووە".

سەبارەت بە کشانەوەی گۆڕان و کۆمەڵ لە حکومەت، نێچیرڤان بارزانی رایگەیاند، گۆڕان دەمێکە لە حکومەتدا نییە و دەشڵێت، لە حکومەتی خۆجێی ناکشێتەوە، "بەڵام لەبارەی کۆمەڵ تێناگەم، لە دەزگا راگەیاندنەکان گوێمان لێبووە کە دەکشێنەوە، دەبوو لە کۆبوونەوەیەکی تایبەتدا باسیان بکردایەوە، رێز لە بڕیارەکەیان دەگرین و بەڵام لەکاتێکدا ئێمە داوای هەڵبژاردن دەکەین بۆ سێ مانگی دیکە، هچ موبەڕیڕ و دەلیلێک نابینین بۆ ئەوە. ئێمە چوار ساڵە پێکەوەین ئەوان نەیاندەزانی کەموکوڕی هەیە کە ئێستا ئەو بڕیارەیان داوە، دەبێ میللەت خۆی بزانێ بڕیارەکەیان بۆ چییە".

 
چاپکردن   Share گه‌ڕانه‌وه‌