2017-12-28

فارس قادر فەقێ عەبدوڵا*

ئەمە پەندێكی كوردییە، واش باوە ئەگەر بابەتێك یان باسێك زۆر لەسەری بڕۆن زۆری بۆ بهێنن و بگوترێت لە ناكاو ئەم پەندە لە لایەن كەسێك یان كەسانێك دەگوترێت مەبەستیش ئەوەیە پیشانبدرێت و بگوترێت (بەسە یان تەواو یان تێگەیشتین یان مەفهوومە یان چیتر لەسەری مەڕۆ) بەهەرحاڵ هەمووی یەك مانایە ئەویش یەعنی چیتر پێویست ناكات باس بكرێت، جام كە پڕ بوو لەسەری دەڕژێت، جا منیش دەڵێم بەڵێ وایە، گەر گۆڕەپانی سیاسی و ناوماڵی كوردی سەیر بكەین، پێموایە هەموومان یەكترمان ناسیوە یان بە لای كەم دەكرێت بڵێین سەرووی 90% بابەتەكان ئاشكرابوون و لە سەدەی رابردووەوە تا ئێستا جەمسەرەكان دیارن و سەنگەرەكانیش دیارن، وەك گوتەنی (.. رەش و سپیش لێكجیابووتەوە) ئەوەی نایەوێت بگاتە راستی خۆی نایەوێت مەبەستی ئەوە نییە كە نازانێت یان تێناگات، نەخێر وانییە، ئەوەی دابڕاوە ئەوەی دژی سەنگەری گەلە بەمەبەست دژە و بە مەبەست دابڕاوە و ئەمڕۆ رۆژی ئەوە نەماوە بڵێی نەمزانی مەبەستم نەبوو، یان بێ ئاگا بووم ئەو گەمەیە تەواو باوی نەما و سەردەمی ئەوە نەما كە خەڵك مێوژ و قالۆچەی نەبینێت و نەزانێت كام مێوژە و كام قالۆچەیە ئەگەر بە رەنگیش وەك یەكبن لە دووریش رەنگی هەردووكیان رەش ببَت لەناو گونیە و تورەكەش لەگەڵ یەك هەڵبگیرێن و دابندرێن، بەڵام كاتێك دەرگای گونیەكە كرایەوە لە سەریان مێوژ لە شوێنی خۆی دەمێنێت و قالۆچەش بۆ دونیای خۆی دەڕوات، كەواتە ناكرێ بڵێین دوژمنمان نەناسی ناكرێ بڵێن یاریێكمان كرد تاكتیكی سیاسی بوو نەمانزانی بۆیە كەركووكمان دۆڕاند و نەخێر خۆفرۆشی بوو، یاری نەبوو، دووبارەكردنەوەی جاشایەتیی باوك و باپیرانتان بوو، سەرشۆڕی بوو، بەڵێ ئێوە پاداشتتان سەرشۆڕی بوو، میللەتیش ماڵوێرانی و دەربەدەری بۆ ماوە ناشكرێت، بڵێین ئەوانە نەفامبوون، منداڵبوون، چەند كەسانێك بوون، چونكە منداڵ و نەفامی چەند كەسانێكی خێزانێك ناكرێت چارەنووس و پەتی سێدارەی میللەتێك لەدەستبگرن، ناكرێت مەسیری میللەتێك بە گاڵتە و یاری منداڵان و ئەتاری دابنێین.
كەواتە بەڵێ خیانەت بوو، بەڵێ سەرشۆڕی بوو، پێویست ناكات زیاتر بگوترێت (زۆرگوتن قورئان خۆشە) ئەم قسانە تەواو واتە تەواو پێیناوێ (نەوت واو مەعاش واو خزمەتگوزاریی واو كەركووك واو) هیچ واو واوی پێ ناوێت، هەموو واوەكان یەكسانە بە گەمەیەكی دۆڕاو ئەویشیان یەكسانە بە حقد و كێشە و گرێكوێرە و مێژوو رەشەكەی دەیان ساڵی باب و باپیرانتان.
بابەتێكی تر سەبارەت بە كەسانی تر، هەر كێ بن وەك دەگوترێت ئەمە سەددام بوو، یان ئەحمەد حەسەن بەكر، نەخێر نوری مالیكی یان عەبادی، یان خۆزگەمان بە زەمانی مەلیك یان بە زەمانی مەدەنییەت و شۆڕشی 1958 یان ئازدییخواز و پیاوە باشەكە (عەبدولكەریم قاسم) یان خۆزگەمان بە (باقر حەكیم) و خۆشەویستەكەی كورد یان بە فڵان شۆڕشگێر و شۆڕەسواری چەپی شیوعی، برایانی بەڕێز هەموویان هەر یەكن بۆ كورد رێوی و ماری سڕ و گورگی برسین و گەر بمبوورن بێوەفا و دڕندە و بێ نمەكن.
پێی ناوێ بڵێن فڵان باش بوو، فڵان باشتر و فڵان وایە و فڵان وانییە و فڵان خراپتر حەقیش نییە چاوەڕوان بین، ئەوانە بین بە برامان، چونكە لە ئەزەلەوە برانین، كورد پەندێكی جوانی هەیە و دەڵێت: ئەوەی نەبێ لە دامەنی شڕم نابێت بە كوڕم. با چیتر لە نێوان ئەوانەی ئێستا و كۆن گرەو نەكەین و نەدۆڕێنین، هەموویان هەریەكن و لە یادتتان نەژێ، كورد دەڵێ (سواری خەڵك هەر پیادەیە) بەڵێ وایە بە هەزاران بەڵێن و قسەی خۆش نابێت، بە قوتووە شیرێك بۆ منداڵێكی برسی و تەواو دەبێت تێبگەین تا چیتر نەدۆڕێنین و دەبێت ئەو پەندەشمان لە یاد نەچێت هەر كوردیشە بۆ برایەتی و یەكگرتنی ناوخۆمان دەڵێت (برا لە پشت برابێت مەگەر قەزا لە لای خودا بێت) و هەر كوردیشە دەڵێت (دار كرمی لە خۆی نەبێت، عومری هەزار ساڵە) و هەر كوردیشە دەڵێت (ئەگەر گوڵ نیت دڕكیش مەبە) من لە پەندێكەوە دەستمپێكرد كە دەڵێت (زۆرگوتن قورئان خۆشە) هەر خۆشم زۆرم گوت زۆر درێژەم پێدا بمبوورن، دیارە بۆ ئەو بارودۆخە ناسكە و ناوماڵ و برایەتی ئێستا زۆری دەوێت و چەندی بگوترێت بۆ برایەتی هەر كەمە، بۆیە كۆمەڵێك پەندی ترم هێناوە و هاتەوە یادم هەر یەكە و دەڵێت منیش مانای خۆمم هەیە، بەڵام ئەوەی گرنگە دەبێت بزانین هەموو ماناكان یەكن، بەڵێ كە دەڵێت كرم مەبە، دڕك مەبە، دیارە كرم و دڕك بۆ ئازاریی گیانی مرۆڤە، كەواتە خائین مەبە، خۆ فرۆش مەبە بەڵێ بەسە، هەروەك لە سەرەتاوە لە پەندێكی ترمان گوتمان جام لە سەری رژا و رژاوەكەش بۆگەن بوو، بۆنی دەرچوو، دەبا شەرم داتان بگرێت، دەبا بەس بێت پەندی دونیا هەمووی لەسەر ئێوە جێبەجێ دەبێت، دەبێ ئێوە گەر بە راست مرۆڤبن و كەس بن كورد دەڵێ (ئەو كەسە كەسە ئەلفێكی بەسە) گەر لە ئەلف تا با و تادەگاتە یائی دونیاش، بەشتان ناكات لە بیرتان نەچێت شاعیری كورد فورمویەتی (سەد هەزار ساڵ بكەیت نۆكەری، هەر دەیهێنی سەرشۆڕی) و باوكی گەورەی كورد بارزانیی نەمریش دەفەرمووێت (گەر كوردایەتی گرانە، خیانەت نەكردن ئاسانە) بۆیە دیسان دەڵێم دەبا بەس بێت، قسە هەزارە دووانی بەكارە، خیانەت مردنە روو رەشییە، شتێكی تێدا نییە، لە پاش مردنیش بڵێین ئەمەی خۆشییە، بۆیە دەڵێم دەبا بەس بێت و زۆرگوتن قورئان خۆشە.   

   *ئەندامی ئەنجوومەنی سەركردایەتی پارێزگای هەولێر (پ. د. ك)

 
چاپکردن   Share گه‌ڕانه‌وه‌