2018-01-03

دڵشاد مستەفا وەسانی

راكردن لە بەرپرسیارییەتی و دەستی چەور بەویدی سڕینەوە، حاڵەتێكی زۆر خراپی ناو جوڵانەوەی سیاسیی كوردستانە، بەرهەمەكەشی بۆ دوژمنانە، دوای 16 ی ئۆكتۆبەر، دوو بابەت زۆر باس دەكرێن، یەكیان ریفڕاندۆمە كە بە چڕی ئیشی لەسەر دەكرێ، ئەویدیش هەڵەی كورد لە بەڕێوەبردنی كەركووك، هەردووكیشیان لە روانگەی بەرژەوەندیی حزبییەوە كاریان لەسەر دەكرێ، دەنا ئەگەر لە بەرژەوەندیی نیشتمانی و نەتەوەییەوە بێت، ئەوا دەبێ نیشانەی پرسیار بخەینە سەر قۆناغەكانی خەباتی رابردووی گەلی كوردستان.
كە دەڵێی خەتای ریفڕاندۆمە وامان بەسەردێ، یان لەبەرئەوەیە نەمانتوانی دڵی عەرەب و توركمان لە كەركووك رازی بكەین، پرسیاری گرنگ سەرهەڵدەدەن و بەدوای وەڵامدا دەگەڕێن، ئەرێ دەبێ هۆی چی بێ كورد لە رابردوو شۆڕشی كردووە؟ بەڕاست نەتەوەی سەردەست و حكوومەتەكانی عێراق چاكەیان لەگەڵ كردووین و ئێمە بە خراپە وەڵاممان داونەتەوە؟ لە خوتوخۆڕایی شۆڕشمان كردووە یان بە فیتی ئەم و ئەو لە دژی جكوومەتی عێراق شەڕمان كردووە؟ ئەی باشە كە دەڵێین نەمانتوانی دڵی عەرەب و توركمان رازی بكەین، دەبێ هێندە خراپەمان لەگەڵ كردبن، بۆیە لە 16ی ئۆكتۆبەر و رۆژانی دوایی، ئەو هەموو رق و كینەیان بەسەردا باراندووین؟ شاڵاوی بە عەرەبكردن بەخێرایی دەستی پێكردەوە، خۆ ئەگەر هەمووشیان بەشداری ئەو تاوانەیان نەكردبێ، بە بەر چاویانەوە كراوە، باشە كە دەڵێین هەڵەمان كرد، ئەوانەی لە مێژووی كورد بێ ئاگان، هەقە بپرسن كاتێ لە رابردوودا شۆڕشمان كردووە، پرسمان بە دەوڵەت كردووە؟
ئەوەی وایكردووە ئەو پرسیارانە و دەیانی دی بكرێن، دەردێكی كوشندەیە، پەتایەكە زیاتر لە نیو سەدەیە بڵاوبۆتەوە، ئەویش دەردی دووبەرەكییە، ئاخر ئەوە ڤایرۆسی دووبەرەكییە، دڵی بەغدا و پایتەختەكانی دەوروبەر بەوە خۆش دەكات، بە 93%ی ئەو دەنگدەرانەی بۆ سەربەخۆیی دەنگیان داوە دەڵێ هەڵەبوون، ئێ خۆ كێشەی بەغدا و تاران و ئەنكارا و دیمەشق ئەوەیە، چۆن هەوڵ بدەن ئەو رێژەیەی دەنگدان، بخرێتە ژێر لێوانەوە و تا دنیا ماوە كەس باسی نەكاتەوە، تاوانی گەورە ئەوەیە، گرووپێك دەستی دوژمن بگرێت، دواتریش بە بەرنامە كار لەسەر ئەوە بكرێ كە ئەوەی روویدا خەتای ریفڕاندۆمە، یان نەمانتوانی كەركووك بەڕێوەببەین.
ناكرێ هەڵە و تاوانی كەسان و گرووپ و حزبێك، بەوە پاساوی بۆ بهێندرێتەوە، نیشانەی پرسیار بخرێتە سەر تەواوی خەبات و كۆششی گەل، ئەگەر بڵێن، ئەوەی روویدا وەستاندنی هەژموونی حزبێك بوو، هەڵەیەكی گەورەترە، چونكە بەرپێنەكە درایە ئامانجی خەڵك، ئەگەر خەتاكە بخەینە ئەستۆی ریفڕاندۆم و داوای خەڵك، كەواتە شۆڕشەكانی رابردووشمان خەتابار دەكەین، ئەمەیە عوزر لە قەباحەت گەورەتر، هەر خۆمان داشی بەغدا سوار دەكەین، بەڕاستی دەرمانی دەردی دووبەرەكی لای خۆمانە، لای كەس نییە، بۆ ئەوەی چیدی خەبات و داخوازیی خەڵك لە پێناوی حزب ناشرین نەكەین، پێویستمان بە بێداربوونەوەیەك هەیە ڕامانچڵەكێنێ.

 
چاپکردن   Share گه‌ڕانه‌وه‌