2018-01-03

جێگری سەرۆكی فڕاكسیۆنی زەرد لە ئەنجوومەنی نوێنەرانی عێراق ڕایدەگەیێنێت، دۆخی سنووری شاری كەركووك گەڕاوەتەوە بۆ بەر لە ساڵی 2003 و، پێویستە بەغدایش بڕیاری كۆتایی بدات و بە زوویی پڕۆسەی بەعەرەبكردن ڕابگیرێت، چونكە ڕێگا نادرێت ئەو بابەتە وا بە ئاسانی تێپەڕێت.
لە دوای ١٦ـی ئۆكتۆبەری پارساڵ كە شاری كەركووك و خورماتوو و خانەقین و سنوورێكی بەرفراوان لە ناوچە كوردستانییەكان بە خیانەتی گرووپێكی نێو لایەنێكی سیاسی ڕادەستی سوپا و حەشدی شەعبی كرا، ڕاستەوخۆ بەغدا لە رێگەی حەشدی شەعبییەوە دەستی بە بەعەرەبكردنی ئەو ناوچانە كردووە و، ھەزاران خێزانی عەرەبیان لە سنووری پارێزگای سەڵاحەددین و ناوچەكانی مووسڵ و خوارووی عێراقەوە ھاوردەی كەركووك و دەوروبەری كردووە.
جێگری سەرۆكی فڕاكسیۆنی زەرد لە ئەنجوومەنی نوێنەرانی عێراق (شاخەوان عەبدوڵڵا)، بۆ ماڵپەڕی فەرمیی پارتی دیموكراتی كوردستان گوتی، "دۆخی سنووری شاری كەركووك گەڕاوەتەوە بۆ بەر لە ساڵی 2003 واتا سەردەمی بەعس، بۆیە ئەمڕۆ لە بەغدا زۆر بە ڕاشكاوانە بە بەرپرسان دەڵێین ئیتر ئەگەر مەبەستیانە لەو سیاسەتە بەردەوام بن، بوونی ئێمەیش لە بەغدا شەرمە، چونكە ئێمە كە قبووڵمان نەكرد لەگەڵ رژێمی (سەددام) بین، لەبەر ئەوە بوو ددانی بە مافی گەلی كورددا نەدەنا و خاكمانی تەعریب دەكرد و زەویشمانی داگیر دەكرد، ئێستایش هەمان سیاسەتە و خاكمان داگیر دەكرێت و زەوییشمان تەعریب دەكرێتەوە."
(عەبدوڵڵا) دەشڵێ، "بوونمان ئێستا لە بەغدا هیچ مانایەكی نییە ئەگەر بەو شێوەیە بێت، دەبێ لەگەڵ میللەتی خۆمان ڕاستگۆ بین و پۆست و ئیمتیازات بخەینە ژێر پێوە، لە بەرانبەردا دەبێ یان بكشێینەوە یان پێویستە بەغدا بڕیاری كۆتایی بدات لەسەر ئەوەی پڕۆسەی بەعەرەبكردن ڕابگیرێ و كێشەی ئەو ناوچانە چارە بكرێت و سیاسەتی پاكتاوكردن و ڕەگەزپەرستی لە بەرانبەر خەڵكی كوردستان ڕابوەستێ".
ماوەی زیاتر لە حەفتەیەكە ژمارەیەك عەرەبی ھاوردە گەڕاونەتەوە سنووری ناحیەی سەرگەڕان و، ھەڕەشەی دەركردنی گوندنشینانی كورد دەكەن بە پشتیوانیی سوپا و حەشدی شەعبی، وەك جێگری سەرۆكی فڕاكسیۆنی زەرد لە ئەنجوومەنی نوێنەرانی عێراقیش گوتی، "ئەوەی لەدەستمان بێت دەیكەین و پرسی كۆكردنەوەی واژۆیش بۆ ئەو مەبەستە لەگەڵ فڕاكسیۆنە كوردستانییەكان باس دەكەین و ڕێگا نادەین ئەو بابەتە وا بە ئاسانی تێپەڕێت."

 
چاپکردن   Share گه‌ڕانه‌وه‌