2018-01-07

 میوزیكژەن عەبدولڕحمان عەبدولرەزاق:
كاتێ ئامێری عود لەباوەش دەگرم هەست بە ئارامییەكی زۆر دەكەم ,وەك ئەوە وایە كۆرپەیەكی خۆم لەباوەش گرتبێت

ئامێری عود تەنیایم ناهێڵێ

دیمانە: توانا زرار
میوزیكژەن عەبدولڕحمان عەبدولرەزاق لەدایكبووی 1980 ی شاری هەولێرە,وەك میوزیك ژەنێكی ئامێری عود هەمیشە لەكاروچالاكییە هونەرییەكاندا بوونی هەبووە.ئەو لەدیمانەیەكی رۆژنامەی خەباتدا ئاماژە بە تێكەڵبوونی بە هونەری میوزیك دەكات و دەڵێت : كاتێ‌ ئامێری عود دەگرمە باوەشم وەك ئەوە وایە كۆرپەیكی خۆم لەباوەشگرتبێ و, بەژەنینی ئەم ئامێرە ئارامییەكی تەواو باڵ بەسەر دڵ و دەروونمدا  دەكێشێت
+  حەز و خولیات بۆ میوزیك بۆ چی دەگەڕێتەوە ، لەنێو میوزیكیش ئامێری عود ؟
_ حەزو خولیام بۆ میوزیك و تێكەڵبوونم بەو بوارە دەگەرێتەوە بۆ كاتەی لەقۆناغی سەرەتایی بووم  لەقوتابخانە, ئەوەی بوو بەهۆكاری ئەوەی زیاتر حەزم بۆ ئەم ئامێرە بچێت دەست پەنجەی میوزیك ژەن مامۆستا وریا ئەحمەد بوو کەوانەی هونەری پێدەگوتینەوە,ئەوە وایكرد دەرگاری میوزیک وهونەر لەپێشم بكاتەوە و حەزو خولیام بۆ هونەر زیادبێت.دەتوانم بڵێم لەوساوە تا ئێستا ئامێری عود بووە بەیەكێك لەو ئامێرانەی هەمیشە چێژی بە روحم بەخشیووە,ئەوە جگە لەوەی بووە بە رەخساندنی كەشێكی ئارام و هێمن كردنەوەی دەروونم لەكاتی نارەحەتیدا..
+ بەئەكادیمی بوون بۆ كەسێك لەناو هونەر كاربكات چەند گرنگە؟
_ هەموو دەزانین هونەر پێش هەموو شت حەزو خولیایە,ئەگەر یەكێك ئەم حەزە لەناخیدا نەبێت ناتوانێت پەرەی پێبدات,زۆربەی زۆری هونەرمەندانی پێشوو ئەكادیمی نەبوون ,بەڵام بەهۆی حەزەكەیان بوون بە كەسانی شارەزا و بەتوانا لەبوارەكەدا.سەبارەت بەئەكادیمی بوونیش  بەڵێ زۆر  گرنگە  ئەو كەسەی لەبواری هونەر كاردەكات لەڕووی زانستیەوە  لە ئەلف و بێی میوزیك  شارەزا بێت  بۆ ئەوەی بەشێوەیەكی جوانتر برەوبەهونەرەكەی بدات.
+ عود بەگەورەی هەموو ئامێرە میوزیكەكان دادەنرێت،تاچەند سودت لەئامێری عود وەرگرتووە بۆ ئاوازدانان؟
_ بێگومان لەگەورەیی ئەو ئامێرە سوودی زۆرم لەئاوازدانان وەرگرتووە،عود یەكێكە لەو ئامێرە میوزیكانەی جیاواز لەئامێرەكانی دیكە دەتوانێت بەهۆییەوە ئاواز بێتە لەدایكبوون.
+ كاتێ عود دەگریتە ئامێز هەست بەچی دەكەیت؟
_ هە ست بە ئاسوودەیی و ئارامییەكی زۆر دە كەم ,وەك ئەوە وایە كۆرپەیەكی خۆم لەباوەش گرتبێت.تەنیایم ناهێڵێ , وەك هاوڕێیەكی هەمیشەییە بۆمن, زمانی  سۆز و خۆشەویستی لە نێوانمان جوانتر دەكات.
+ جگە لەئامێری عود شارەزایت لەژەنینی چ ئامێرێكی دیكەی میوزیك هەیە؟
_ جگە لەئامێری عود سازیش دە ژەنم ,بەڵام هێندەی چێژ لە عود دەبینم لەساز نایبینم.
+ لەزۆر چالاكی هونەری دەبینم بەشداری دەكەن،ئەو چالاكیانەتان وەك گروپە تیایدا بەشادارن؟

_ بەڵێ وەك گرووپ بەشدارم ,هەروەها ئەندامیشم لە گرووپی ئەستێرە چالاكیشمان بەردەوام هەبووە.
+ لەكۆتای ئەگەر شتێكت مابێ بتەوێی ئاماژەی پێبكەی؟
_ سوپاس بۆ رۆژنامەی خەبات,بەوهیوایەم هموو پێكەوە بتوانین كاری جوانتر و باشتر پێشكەش بەم وڵاتە بكەین,داواكاریشم لەلایەنی پەیوەندار پشتیگیری هونەرمەندان بكات بۆ ئەوەی لەرێگەی هونەرەوە خزمەتی زیاتر بكەن,هونەری كوردی دە وڵەمەندە هیوادارم ئەوانەی لەم بوارە كارەكەن هەمیشە كاری جوان بكەن بۆ زیاتر دەولەمەندكردنی هونەر و میوزیكی كوردی.

 
چاپکردن   Share گه‌ڕانه‌وه‌