2018-01-28

شەڕ و ڕووبەڕووبوونەوە لە شاری عەفرینی ڕۆژئاوای كوردستان بەرانبەر بە هێرشی داگیركاری توركیا و هاوپەیمانەكانی بەردەوامی هەیە و ئەمڕۆ پێی نایە ڕۆژی نۆیەمەوە، بۆردمانی تۆپهاوێژ و فڕۆكە جەنگییەكانی توركیا بە چڕی لە چەندان میحوەرەوە بەردەوامی هەیە، هاوكات باس لە بەكارهێنانی بۆمبی ناپاڵم لەلایەن توركیاوە دەكرێ لە كاتی بۆردمانكردنی ناوچەكانی عەفرین.

لە ناوچەی جوندێرسی باشووری ڕۆژئاوای عەفرین، قورسترین شەڕ و ڕووبەڕووبوونەوە هەیە، لە دوای دەست پێكردنی هێرشی داگیركاری توركیا بۆ سەر شارەكە، شەڕڤانان بەرگرییەكی بێوێنە دەكەن و توركیایش بە هەموو هێزی خۆیەوە بۆردمانی ناوچەكە دەكات و هەوڵی پێشڕەوی دەدات.

پەیامنێری "سكای نیوز" دەڵێ، هێزەكانی توركیا تا ئێستە لە ڕووی وشكایییەوە نەیانتوانیوە هیچ پێشڕەوییەك ئەنجام بدەم، دوای نۆ ڕۆژ لە دەست پێكردنی هێرشەكەیان، هاوكات شەڕ و ڕووبەڕووبوونەوەكان بە چڕی بەردەوامییان هەیە، لە شارەدێی راجۆی باكوری ڕۆژئاوای عەفرین، دوای ئەوەی لە بەیانی ئەمڕۆ هێزەكانی توركیا هێزەكانی وشكایییان دەستیان بە پێشڕەوی كردووە.

لەلایەكی ترەوە، هێزەكانی سووریای دیموكرات چەندان وێنە و زانیارییان بڵاو كردووەتەوە و هێما بۆ ئەوە دەكەن، توركیا بۆمبی ناپاڵم لە بۆردمانەكانی بەكار دەهێنێ، كە یەكێكە لە بۆمبە قەدەغەكراوەكان لەلایەن كۆمەڵگەی نێودەوڵەتییەوە، چونكە گازێكی كۆمەڵكوژە و بە تەواوی ڕێی بەكارهێنانی لەلایەن نەتەوە یەكگرتووەكانەوە قەدەغە كراوە.

 
چاپکردن   Share گه‌ڕانه‌وه‌