2018-01-30

  بەرپرسی لقی ٢٣ـی پارتی لە مەخموور دەڵێ، كادیری لایەنێكی كوردستانی، پێش لەشكری حەشدی شەعبی كەوتوون بۆ دەستگیركردنی ئەندام و لایەنگرانی پارتی.
دوای هێرشی داگیركاریی حەشدی شەعبی و سوپای عێراق بۆ سەر ناوچە كوردستانییەكانی دەرەوەی ئیدارەی حكوومەتی ھەرێمی كوردستان، کە بە ڕووداوەکانی ١٦ـی ئۆکتۆبەر ناسراوە، لە سنووری شارۆچكەی مەخمووریش ھاوشێوەی كەركووك و خورماتوو، ھێزە عێراقییەكان و میلیشیاكانی حەشدی شەعبی كێشە بۆ ھاووڵاتیانی كورد دروست دەكەن و چەندین پێشێلكارییان ئەنجام داوە، ھەر جارە و بە ناوێك و لە ژێر بیانوویەكیشەوە سووكایەتی بە خەڵكی ناوچەكە دەكەن.
كرمانج عەبدوڵڵا، بەرپرسی لقی ٢٣ـی پارتی لە مەخموور، لەو بارەیەوە دەڵێ، "رۆژی یەكشەممە، پۆلیسی فیدرَاڵی كە لە بنەڕەتدا پۆلیس نین و چەكداری حەشدن، ھەڵمەتێكی پشكنینی ماڵی ئەندام و لایەنگران و پێشمەرگەكانی پارتییان لەنێو شارۆچكەی مەخموور دەست پێ كردووە".
ئەو بە ماڵپەڕی فەرمیی پارتی دیموكراتی كوردستانی راگەیاند، "ژمارەیەك كادیر و ئەندامی ئێمە دەستگیر كراون، دواتر لێكۆڵینەوەیان لەگەڵ كراوە و ئینجا ئازاد كراون، بەڵام جگە لە گرتن و راوەدوونانی ئەندام و لایەنگرانی ئێمە، میلیشیاكانی حەشدی شەعبی دەستیان بەسەر ژمارەیەك ئۆتۆمبێڵ و كەلوپەلی ئەو كەسانەدا گرتووە كە نزیكن لە پارتییەوە".
ئەو بەرپرسەی پارتی ئاماژەیشی دا، "نیگەرانیی ئێمە ئەوەیە، كادیری لایەنێكی كوردستانی لە مەخموور پێش میلیشیاكانی حەشد كەوتوون بۆ پشكنین و دەستگیركردنی ئەندام و لایەنگرانی ئێمە. خۆزگە ئەوەمان نەدەبینی لەگەڵ نەیارانی كوردستان ماڵی یەكتر بپشكنین".
عەبدوڵڵا هەروەها دەڵێ، "ئێمە دڵنیاین ئەو رەوشە داگیركارییەی لە مەخموور و كەركووك ھەیە، تا سەر بەردەوام نابێت و، سەرەتا دەمانەوێ لە ڕێی دانوستانەوە كێشەكان چارە بكرێن. هەڵبەتە نێچیرڤان بارزانی سەرۆكوەزیران، دەستی بە دانوستان كردووە بۆ كۆتاییھێنان بە كێشەكان، چونكە ئەگەر  رەوشەكە بەردەوام بێت، ئەوا دڵنیایی دەدەینە دانیشتووانی ئەو ناوچە داگیركراوانە، ئێمە بێدەنگ نابین لە ھەمبەر ئەو ستەمەی لێیان دەكرێت".

 
چاپکردن   Share گه‌ڕانه‌وه‌