2018-02-07

سەباح شێخانى

چاکسازى راستەقینە پایەکانی حوکمڕانی و هەلومەرجی ژیانی هێمن و تەندروست لە کۆمەڵگەدا دەرەخسێنێ، دەتوانین راپەرینی بەهاری ساڵی 1991 ی خەڵکی کوردستان وەک گەورەترین چاکسازی سیاسی ئەژماربکەین، چونکە کۆتایی هات بە دەیان ساڵی ژێردەستەیی و هەژاری و بێ ناسنامەیی، بەجۆرێک هەرێمی کوردستانی گواستەوە بەرەو قۆناغی حوکمڕانی یاسایی و دیمۆکراسی، دوای تێپەربونی 27 ساڵ بەسەر ئازادى و حکومڕانی خۆماڵیدا، بەڕەچاوکردنی بارودۆخ و گۆڕانکارییەکانی کۆمەڵگە، وا دەخوازێت پێشکەوتنی زیاتر بێتەکایەوە، یەکەم هەنگاویش بەرەو پێشکەوتن دەستبردنە بۆ چاکسازی.
 چاکسازى بەندە بە ئاستی رۆشنبیری و پێشکەتنی کۆمەڵگەوە، لە هیچ قۆناغێکى مێژوودا، پڕۆسەی چاکسازی بێ گیروگرفت نابێت لەبەر ئەوەى بەرژەوەندى نارەواى هەندێ کەس دەکەوێتە مەترسییەوە، ئیتر دەست دەکەن بە نارەزایی لابەلا، دڵگرانبوونی رێژەیەکی کەمی خەڵک، بەڵام هەر هەنگاوێکى راستەقینە بەرەو چاکسازى، یەکسان دەبێت بە بەرزبوونەوەی کێرڤی رازیبوونى جەماوەر و جوانترکردنی دەسەڵات.
چاکسازی پێویستی بە زەمینەیەکی لە بار هەیە، هەرێمی کوردستان بە قۆناغێکی زۆر سەخت و دژواردا تێپەڕدەبێت، وەک هەر شوێنێکى دیکەی ئەم جیهانە پێویستی بە چاکسازی و پێداچوونەوە هەیە.
دروستکردنەوەی متمانە بەوە دەکرێت کە لە بڕیارەکانی چاکسازی بەرژەوەندی خەڵکی هەژار و کەمدەرامەت و مووچەخۆر لە سەرووی هەموو بەرژەوەندییەکانی دیکەوە بێت، دەستبکرێت بە پرۆسەی سزادانی ئەوانەی لەسەر حیسابی سامانی گشتی دەوڵەمەند بوون، داهاتەکان شەفافتر بکرێن و هەموو جۆرە نادادیەک لە دابەشکردنی سامان و پۆست و وەزیفەی گشتی پێداچوونەوەی بنەڕەتی پێدا بکرێت، قۆرخکاری نەمێنێت، بازرگانی لە بەرپرسە باڵاکان قەدەغە بکرێت، موڵک و ماڵی هەرێم پارێزراو بێت و نەهێڵدرێت چیدیکە زێدەڕۆیی بکرێتە سەر، چاکسازی‌ دەستپێکێکی‌ باشە بۆ ئەوەی‌ راشکاوانە پەنجە بخرێتە سەر برینەکان‌.
هیچ کەسێک لە چارەنووس و ئیرادەی گەل باڵاتر نییە، میللەتیش دادپەروەری و نوێبوونەوەی دەوێت، چارەنووسمان بە سەرکەوتنی چاکسازییەوە گرێ دراوە، دەبێ بڕیارەکانی چاکسازی هەموو سێکتەر و کەس و لایەنێک بگرێتەوە، نابێ کەس حەسانەی هەبێت و نابێت هیچ بابەتێکیش هێڵی سوور بێت.
 چاکسازی پرسی مانەوە و زیندووێتی دامەزراوەکانە، هیچ دامەزراوە و دەزگایەک بەبێ چاکسازی توانای بەردەوام بوونی نییە، چەندە پرۆسەی چاکسازی دوابخرێت، دەرهاویشتە نەرێنییەکانی زیاتر دەبێت.

 
چاپکردن   Share گه‌ڕانه‌وه‌