2018-03-24

سه‌رچاوه‌يه‌كى ئه‌منى له‌ سنوورى پارێزگاى سه‌لاحه‌دين، رايگه‌ياند، ئه‌مڕۆ داعش هه‌شت كارمه‌ندى پۆليسى ئيتيحادى له‌ سه‌لاحه‌دين و دياله‌ گوله‌بارانكردووه‌.

ئه‌و هه‌شت پۆليسه‌، له‌ ناوچه‌ى حه‌مرين و له‌ نێوان سه‌لاحه‌دين و دياله‌ كه‌وتبوونه‌ بۆسه‌ى چه‌كدارانى داعشه‌وه‌ و ده‌ستگيركرابوون.

هه‌ر له‌و باره‌يه‌وه‌، رێكخراوى داعش له‌ رێى تۆڕه‌ كۆمه‌ڵايه‌تييه‌كانه‌وه‌ گرته‌ى ڤيديۆيى و وێنه‌ى گوله‌بارانكردنى ئه‌و هه‌شت كه‌سه‌ى بڵاوكردووه‌ته‌وه‌.

داعش له‌و باره‌يه‌وه‌ رايگه‌ياندووه‌، ئه‌وانه‌ به‌رپرس و چه‌كدارى ريزى سريه‌كانى سه‌لامى سه‌ر به‌ موقته‌دا سه‌در بوونه‌.

پێش چه‌ند رۆژێكيش، 10 هاووڵاتى كه‌وتنه‌ بۆسه‌ى چه‌كدارانى داعش له‌ سه‌ر رێگه‌ى كه‌ركووك/ به‌غدا و به‌ هۆى هێرشى داعشه‌وه‌ كوژران.

سه‌رهه‌ڵدانه‌وه‌ى مه‌ترسى داعش له‌ ناوچه‌كانى باشوور و رۆژئاواى كه‌ركووك و سنوورى به‌رزاييه‌كانى حه‌مرين، بووه‌ته‌ جێى باسى ناوه‌نده‌ ئه‌منييه‌كان.

حكومه‌تى عێراق له‌ 27ى كانوونى يه‌كه‌م/ ديسێمبه‌رى 2017دا سه‌ركه‌وتنى يه‌كجاره‌كى به‌سه‌ر داعشدا راگه‌ياندبوو، به‌ڵام وه‌ك زانيارييه‌ ميدياييه‌كان ئاماژه‌ى بۆ ده‌كه‌ن، تا ئێستا سنوورى پارێزگاى كه‌ركووك مه‌ترسى تيرۆرى تێدا ماوه‌ و داعش بنبڕ نه‌كراوه‌ له‌ ناوچه‌كه‌دا.


K24

 
چاپکردن   Share گه‌ڕانه‌وه‌