2010-05-18

یانەی بەرشلۆنە توانی پارێزگاری لە نازناوی خولی ئیسپانیا بكات بۆ دووەمجار لەسەر یەك دوای ململانێیەكی بەهێز لەگەڵ یانەی ریال مەدرید كە نزیكەی 38جەولە خایاندی. بەرشلۆنە لەدواین جەولەدا توانی سەركەوێت بەسەر یانەی بەلەد وەلید بە چوار گۆڵی خاوێن و لە بەرامبەریشدا یانەی ریال مەدرید بە 1-1گۆڵ لەگەڵ مەلەگە بەرامبەر بوو. بەم ئەنجامەش كۆی خاڵەكانی بەرشلۆنە بووە 99خاڵ كە ژمارەیەكی پێوانەییە لە مێژووی تۆپی پێی ئیسپانیادا و بەجیاوازی 3خاڵ لەپێش ریالی دووەم مایەوە. لەم یارییەدا 98هەزار هاندەر ئامادەی یاریگابوو پێشوەختیش خۆیان بۆ گێڕانی ئاهەنگ ئامادەكردبوو. تیایدا 3یانە دابەزینە ریزی پلە دووەكان كە ئەوانیش خێرێس كە بەرامبەر بوو لەگەڵ ئۆساسۆنا بە 1-1گۆڵ و بەلەد وەلید و تێنێرفی كە بەرامبەر ڤالنسیا بە1- 0 دۆڕا. بەرامبەربوونی یانەی مەلەگە لەگەڵ یانەی ریال مەدرید وایكرد هەناسەی مانەوەی ئەو یانەیە لە خولی پلە یەكەكان درێژ ببێتەوە بۆ وەرزی داهاتوو، كە ئەوانیش لەدوای كۆتایی هاتنی یارییەكە شان بەشانی ئاهەنگی بەرشلۆنەی خاوەن نازناو ئاهەنگی مانەوەیان گێڕا. بەم نازناوەش كۆی نازناوەكانی بەرشلۆنە بووە 20نازناو بەرامبەر بە 31نازناو بۆ ریال مەدرید، هەروەها چوارەم نازناویش لە6ساڵی رابردوودا. لەم یارییەشدا میسی وەكو پیشەیی هەمیشەی رابەرایەتی یانەی بەرشلۆنەی كرد بە 2گۆڵ و كۆی گۆڵەكانی بووە 34گۆڵ و ژمارەی رۆناڵدۆی بەرازیلی بەرامبەر كردەوە، هەروەها 47گۆڵیشی لەسەر ئاستی هەموو پاڵەوانێتییەكان هەیە.گۆڵەكانی دیكەش لەلایەن پێدرۆ و بەرگریكاری بەلەد وەلیدبەهەڵە تۆماركران. هەر لەم یارییەشدا خوان لاپۆرتا ماڵئاوایی لە جەماوەر كرد كە 7ساڵە لەگەڵیانەو توانی 11نازناو بكاتە خەڵاتیان. ڤالنسیاش بە پلەی سێیەم هات بە 71خاڵ و ئەشبیلیەش توانی بگاتە خولی یانە پاڵەوانەكان بەرشلۆنە توانی 98گۆڵ تۆمار بكات و تەنها 24گۆڵی لێكراو 99خاڵیشی كۆكردەوە، یانەی ریال مەدرید 102گۆڵی تۆماركردو 35گۆڵی لێكراو 96خاڵی كۆكردەوە . ریزبەندی كۆتایش بەمشێوەیەی خوارەوە بوو:

بەرشلۆنە 99خاڵ، ریال مەدرید 96خاڵ، ڤالنسیا 71خاڵ، ئەشبیلیە 63خاڵ- هەرسێ یانە بۆ خولی یانە پاڵەوانەكان، ریال مایۆركا 62خاڵ، خیتافی 58خاڵ-هەردوو یانە بۆ خولی ئەوروپا لیگ، ڤیاریال56خاڵ، ئەتلەتیك بلباو54خاڵ، ئەتلەتیكۆ مەدرید47خاڵ، دیپۆرتیڤۆ 47، ئیسپانیۆل44خاڵ، ئۆساسۆنا43خاڵ، ئەلمێریا 42خاڵ، ریال زاراگۆزا41خاڵ، خیخۆن 40خاڵ، راسینگ 39خاڵ، مەلەگە37خاڵ، بەلەد وەلید36خاڵ، تینیرفی36خاڵ، خیریز34خاڵ.

 

نەبەز روستایی

 

 
چاپکردن   Share گه‌ڕانه‌وه‌