2010-05-26

دروشمی ئێمە وەكو پارتی دیموكراتی كوردستان هەمیشە دیموكراسییەت بۆ ئێراق ومافی نەتەوەیی بۆ گەلی كورد بووە، چونكە بڕوامان بەوە بووە بەبێ دیموكراسییەت هیچ گرفتێكی ئێراق چارەسەر نابێت

 

ئێمە هەمیشە داوای ئازادیی گەلان دەكەین وداوای ژیانی پڕ لەئازادیی دەوڵەت وگەلان دەكەین

 

فاكتەری دەرەكی بەڕێژەی 50% كاریگەریی بەسەر دواكەوتنی پێكهێنانی حكوومەی ئێراقەوە هەیە و تەنها كوردخاوەنی بڕیاری سیاسیی هەرە سەربەخۆیە

 

هیچ كاتێك وەكو كورد ووەكو پارتی دیموكراتی كوردستان هەڵوێستی یەكێتیی سۆڤیێت بەلەباوەشگرتنی بارزانیی نەمر و500 لەپێشمەرگەكانی لەساڵی 1947 لەیادناكەین وئەگەر پاراستنی ئەوان بۆ ئەو سەركردەیە نەبوایە ئەوەی لەدوای ساڵی 1958 هاتەدی دوای گەڕانەوەی بۆ ئێراق نەدەهاتەدی

 

دووپات لەسەر ویستی خۆمان دەكەینەوە كەسەرۆكی كۆمار كورد بێت و فەخامەتی سەرۆك جەلال تاڵەبانی كاندیدی ئێمەیە بۆسەرۆكایەتیی كۆمار

 

 

بەبۆنەی گرێدانی چوارەمین كۆنفرانسی نێونەتەوەیی پارتە نیشتیمانپەروەرەكان لەڕووسیا، ئاژانسی نۆڤۆستیی ڕووسیا دیدارێكی ڕۆژنامەوانیی بۆ بەڕێز فازڵ میرانی سكرتێری مەكتەبی سیاسی لەگەڵ چەند ڕۆژنامەنووس و توێژەرێكی سیاسی ڕێكخست تیایدا سكرتێری مەكتەبی سیاسی كورتەیەكی مێژوویی دەربارەی پارتی پێشكەش كردو تیشكی خستە سەر بارودۆخی ئێراق وهەرێمی كوردستان ودواتر وەڵامی پرسیاری ئامادەبووانی دایەوە.

كورتەیەكی مێژووی دەربارەی پارتی

لەبەرایی دیدارەكەدا سكرتێری مەكتەبی سیاسی خۆشحاڵیی خۆی بۆ ئەو دیدارە نیشانداو كورتەیەكی مێژوویی دەربارەی پارتی دیموكراتی كوردستان و شێوازی كاری حزبی وسیاسیی تیادا پێشكەشكردو گوتی: پارتی دیموكراتی كوردستان لەساڵی 1946 بەسەرۆكایەتیی بارزانیی نەمر دامەزرا، حزبی ئێمە لەوەتەی دامەزراندنییەوە پشتی بەدیموكراسییەت ومەركەزییەتی دیموكراتی بەستووەو چەندین هەنگاوو قۆناغی خەباتی نەتەوەیی بڕیوە بەهەردوو جۆری چەكداری وسیاسییەوە.

ئەو حزبە لەسەر ئاستی ئێراق وكوردستان چەندین دەستكەوتی نیشتیمانی ونەتەوەیی بەدەستهێناوەو دروشمی ئێمە هەمیشە دیموكراسییەت بۆ ئێراق ومافی نەتەوەیی بۆ گەلی كورد بووە. چونكە ئێمە بڕوامان بەوە بووە بەبێ دیموكراسییەت هیچ گرفتێكی ئێراق چارەسەر نابێت وئەزموونی سیاسیش ئەوەی سەلماند، بۆ یەكەمین جاریش لەساڵی 1970 ئێمە مافی ئۆتۆنۆمیی خۆمان چەسپاند وحكوومەت ی ئەوسای ئێراق بەئیمزاكردنی ڕێككەوتنی 11ی ئاداری 1970 پابەندبوو بەڵام بەهۆی دیموكراسی نەبوونی حكوومەت لەئاداری 1974 جارێكی دیكە شۆڕش داگیرسایەوەو ئەو ڕێككەوتنە ڕووخێنرا.

ڕۆڵێكی گرنگ

میرانی دووپاتیكردەوە پارتی ڕۆڵێكی گرنگی لەچەسپاندنی پرەنسیپەكانی دیموكراسییەت ویەكێتیی نیشتیمانی وهێنانەدیی دیموكراسییەت بۆ هەموو پێكهاتەكانی ئێراق هەبوو بەعەرەب وكوردو توركمان وئاشووری وكلدان وئەرمەن، بەموسڵمان ومەسیحی وئێزدی وسابیئەوە.

هەروەها گوتی: پەیوەندیی ئێمە لەگەڵ پێكهاتەكانی پرۆسەی سیاسیی ئێراق باشە، لەڕێزی ئۆپۆزیسیۆنی ئێراقی بەیەكەوە كارمان كرد وبەشێوەیەكی جیددی كارمان بۆ گۆڕینی ڕژێمی پێشووی ئێراق كرد.

پرۆسەیەكی سەركەوتووی سیاسی

دواتر میرانی هاتەسەرباسی پرۆسەی سیاسیی هەرێمی كوردستان ونیشانیدا لەساڵی 1992ەوە پرۆسەیەكی دیموكراسی لەكوردستانی ئێراقدا هەیە وپەرلەمانێك وحكوومەت و دەسەڵاتێكی ناوخۆیی هەیەو گوتی: بەڕێز مسعود بارزانی سەرۆكی حزبمان، سەرۆكی پارتی دیموكراتی كوردستانە یەكەمین جار بەشێوەیەكی ڕاستەوخۆ وەكو سەرۆكی هەرێم هەڵبژێردرایەوە.

بێگومان هیچ شتێكی نموونەیی لەجیهاندا نییەو ئێمە ئیدیعای نموونەییبوون ناكەین نەلەسەر ئاستی ئێراق ونەلەسەر ئاستی هەرێمی كوردستانیش بەڵام گەلی ئێمە زوو هەوای ئازادی هەڵمژی ودەستی بەدیموكراسییەت كرد لەڕێگەی هەڵبژاردن بۆیە ئەگەر لێرەو لەوێش گلەیی هەبن گەلی ئێمە هیچ كاتێك لەدیموكراسییەت پەشیمان نابێتەوە.

هەروەها پێشكەوتنێكی بەرچاو لەڕووی ئاوەدانكارییەوە لەكوردستاندا دەبینرێت لەڕووی پەیوەندیی دەرەكیش كوردستان گەشەی سەندووە بەپێی دەستوور، هەرێمی كوردستان ئەمڕۆ خاوەن 2 فڕۆكەخانەی نێودەوڵەتی و5زانكۆی حكوومی و5 زانكۆی ئەهلییە 2 ئەكادیمیای سەربازیشی تیادایە كەناویان پێشكەش بە وەزراەتی بەرگری ئێراق پێشەشكراوە بۆ ئامادەكردنی ئەفسەری خزمەتكاری ووڵات بەپێی دەستوور ئەوە جگە لەهەبوونی زیاتر لە20 نوێنەرایەتی وكونسوڵگەریی دەوڵ’تانی عەرەبی وبیانی ونوێنەرایەتیی نەتەوە یەكگرتووەكان ویەكێتیی ئەرووپاو هەبوونی دەیەها كۆمپانیای وەبەرهێنان بەتایبەتی دوای دەرچوونی یاسایەكی هاوچەرخی وەبەرهێنان كە ڕێگە بەموڵكایەتیی زەوی دەدات بۆكۆمپانیای وەبەرهێنەر ئەوەش لەڕۆژهەڵاتی ناوەڕاستدا نییە.

بارودۆخی ئێراق و ئەجەندای بیانی

میرانی دانی بەهەبوونی گرفتی لەئێراق وهەبوونی ئەجەندای دەرەكی نا بەتایبەتی لەڕووی تەدەخولی ئیقلیمی بۆ پاراستنی بەرژەوەندیی ئەجەندای ئەو ووڵاتانە،هەروەها دووپاتیكردەوە سەركردایەتیی كوردستان وسەرۆك تاڵەبانی وسەرۆك بارزانی بەجیددی كار بۆ سەرخستنی پرۆسەی سیاسیی ئێراق وهاوخەباتیی لایەنە نیشتیمانپەروەرەكانی ئێراق دەكەن وگوتی: ئێمە هیچ كەسێك لەپرۆسەی سیاسی لانادەین تەنها ئەوانە نەبن كەدەیانەوێ ئێمە لەوپرۆسەیە لابدەن، ئێراق ئەمڕۆ بۆیەكەمین جار خاوەنی دەستوورێكە كەپتر لە80%ی ئێراقییان دەنگیان لەسەری داوە، ئەو دەستوورە حەكەمی ئێمەیەو پەیوەندیی گەل و دەسەڵاتی بەیەكەوە ڕوونكردۆتەوە.

وەكو ئێراقی هیواخوازین بەسەر هەموو گرفت وئاریشەكانمان سەربكەوین هەرێمی كوردستانیش فاكتەری یارمەتیدەرە بۆ ئەو گرفتانە.هیواداریشین ووڵاتانی دۆست لەپاڵپشتیی ئێراق درێغی نەكەن بۆ چەسپاندنی ئاسایش كەبەبێ ئەو سەقامگیری نایەتەدی.

دوایین هەڵبژاردن

لەباسی دوایین پرۆسەی هەڵبژاردندا میرانی دووپاتیكردەوە چەندین لیست وقەوارە بەشداریان لەپرۆسەكە كردو وێڕای هەموو تانەكان پرۆسەكە بەبێ گرفت بەڕێوەچوو ئاماژەی بەوەشدا سەركەوتوو ستایشی پرۆسەكە دەكات وسەرنەكەوتووش تانەی لێدەدات وگوتی: ئەنجامی هەڵبژاردن بۆ هەموو گەلی ئێراق گرنگە نەك بۆ لیستێكی دیاریكراو یان بۆ حزبێكی دیاریكراو، لەدوایین كۆبوونەوەی كۆمیتەی ناوەندیی پارتیش داوامان لەلیستەكان كرد تانەكانی خۆیان بكشێننەوە و بەپشت بەستن بەهەڵوێستی نیشتیمانیمان كار بۆ پڕكردنەوەی بۆشایی ئیداری وسیاسی وپێكهێنانی حكوومەت بكەن، هەندێ لەلیستەكان ئەو داوایەی ئێمەیان بەجێهێنا لەوانەش هاوپەیمانیی كوردستان، تائێستاش گفتوگۆ بۆهەڵبژاردنی سەرۆكی كۆماروسەرۆكی پەرلەمان بەردەوامن. ئێراق ووڵاتێكی فرەنەتەوەو ئایین وتایفەو ئینتیمای سیاسییە ئەمەش سیمایەكە مایەی شانازیی هەموو ئێراقە بۆ پێكەوەژیان ، وپەنا بەخوا بە ویستێكی نیشتیمانیشەوە دەمانەوێ بەسەر هەموو ئاریشەكانماندا سەربكەوین بۆ پێكهێنانی حكوومەت ئەگەر ئەوانی دیكە وازیان لەدەستێوەردان لەكاروباری ئێمەداكرد.

ئێمە هەمیشە داوای ئازادیی گەلان دەكەین وداوای ژیانی پڕ لەئازادیی دەوڵەت وگەلان دەكەین.

واقیعییەت لەباسكردنی بارودۆخ

میرانی لەوەڵامی پرسیارێكدا دەربارەی كەموكوڕییەكانی پرۆسەی سیاسیی ئێراق نیشانیدا واقیعییەت ودووربوون لەموجامەلە باشترین ناسنامەی كەسانێكی خاوەن پرسی نەتەوەیی ونیشتیمانین چونكە قسەكردن بەدووربوون لەواقیع شێوازێكی هەڵەیە لەشیكردنەوەی بارودۆخی سیاسی وگوتی: 4 لیست لەدوایین هەڵبژاردنی ئێراقدا سەركەوتن كەلیستی (العراقیە بە91 كورسی وئیئتیلافی دەوڵەتی قانون بە89 كورسی وئیئتیلافی نیشتیمانی بە70 كورسی وهاوپەیمانیی كوردستان بە 60كورسی) ململانێ وكێبڕكێ بۆ سەرۆكایەتیی وەزیران هەیە لەنێوان 3 كورسیدا (العراقیەودەوڵەتی یاساو ئیئتیلافی نیشتیمانی) هەموو لیستەكانیش بۆ یەك حزب نین بەڵكو لیستێكی چەند حزبی وچەند كەسایەتین بۆیە چەند پێكهێنانی حكوومەت دوابكەوێ بارودۆخی ئێراق بەگشتی كاریەگەریی نێگەتیڤی دەبێت بەكوردستانیشەوە چونكە سەقامگیریی ئێراق سەقامگیریی ئێمەشە.

بۆ نموونە ئەگەر حكوومەت نەبێت 17% ی بودجەی كوردستان لەبەغداوە نایەتە كوردستان، دەستەی سەرۆكایەتی ودەستەی جێبەجێكردنی حكوومی هەیە لەبەغدا بەڵام دەزگایەكی تەشریعی نییە بۆ چاودێریكردنی كاری ئەو دەزگایانە بۆیە ئێمە بەپێویستی دەزانین پەلە بكرێت لەگرێدانی دانیشتنی یەكەمی پەرلەمان وچەسپاندنی لیستە براوەكان و بەتایبەتی دوای ئەوەی هەژماركردنەوەی دەنگەكانی بەغدا هیچ جیاوازییەكیان نیشان نەدا لەئەنجامی هەڵبژاردن.

لەوانەیە پرۆسەی پێكهێنانی حكوومەت كاتێكی زیاتر بخایەنێت بەڵام پێویستە چوارچێوەیەكی یاسایی وشەرعی بۆكاری حكوومەتی (تصریف الاعمال) بدۆزرێتەوە.

لەلایەنی یاساییەوە دەكرێ دەستەیەكی تەشریعی هەبێت بڕیاری وابدات هێزی یاسشای هەبێت بەڵام بۆی نییە یاسا دەربكات وئەوە عورفە ویاسا نییە بەڵام عورفیش سەرچاوەیەكی سەرەكیی یاسایە، بۆنموونە بەریتانیای مەزن تائێستا بەیاساو عورف بەڕێوە دەچێت نەك دەستوور.

بەڵێ هەرێمی كوردستان وەكو بەشێكی كاریگەری ئێراق كاریگەریی نێگەتیڤی بەسەردا دەبێت.دەشتوانم بڵێم فاكتەری دەرەكیش بەڕێژەی 50% كاریگەریی بەسەر دواكەوتنی پێكهێنانی حكوومەی ئێراقەوە هەیە.

پەیوەندیی نێوان كوردستان وڕووسیا

لەباسكردنی پەیوەندیی نێوان كوردو ڕووسیا میرانی دووپاتیكردەوە لەقۆناغە جیاجیاكاندا لەسەر ئاستی جەماوەری وسیاسی وحزبیدا هەمیشە باش بووە چ لەقۆناغی یەكێتیی سۆڤیێتی پێشوو لەڕووی حزبیشەوە پەیوەندیی پتەو لەنێوان پارتی وحزبی شیوعیی سۆڤیێتی هەبوو، ئێمە هیچ كاتێك وەكو كورد ووەكو پارتی دیموكراتی كوردستان هیچ كاتێك هەڵوێستی یەكێتیی سۆڤیێت بەلەباوەشگرتنی بارزانیی نەمر و500 لەپێشمەرگەكانی لەساڵی 1947 لەیادناكەین كاتێك پەنایان بۆ ئەوێ برد وئەگەر پاراستنی ئەوان بۆ ئەو سەركردەیە نەبوایە ئەوەی لەدوای ساڵی 1958 هاتەدی دوای گەڕانەوەی بۆ ئێراق نەدەهاتەدی. ئێستاش ئەوپەڕی سوپاسگوزاریمان بۆ یەكێتیی سۆڤیێتی دوێنێ و ڕووسیای ئەمڕۆ هەیە بۆ دابینكردنی زەمالەی خوێندن بۆ قوتابیانمان، وە دەبینین ژمارەیەكی زۆری وەزیرو بەرپرسانی حكوومی وحزبی دەرچووی زانكۆكانی ئەم ووڵاتەن.

هەروەها پەیوەندیی خوێنیش لەنێوان كورد وڕووسیادا هەیە بەتایبەتی بەمانەوەی ئەو پێشمەرگانەی لەگەڵ بارزانیی نەمردا بوون ژنی سۆڤێتییان هێناو منداڵیشیان لێیان بوو. ئێستاش هەزارەها گەنجمان هەن هەڵگری هەردوو ناسنامەو جینی كوردی وڕووسین،كاك خۆشەویی نوێنەری ئێمە خوازبێنیی خاتوو لیلیانای كردو ئێستاش كوڕێكیان هەیە كە هەم كوردە و هەم ڕووسیشە، ئەو ووڵاتەش پاڵپشتیی بزاڤی ڕزگاریخوازی گەلانی كردووە كە كوردیش لێی بێبەش نەبوو ئەمڕۆش كونسوڵگەریی گشتیی ڕووسیا لەكوردستاندا هەیەو ئەمڕۆش شاندی حزبی ئێمەو چەندین حزبی ڕووسیاش لێرەین بەمەبەستی زیندووكردنەوەی ئەو پەیوەندییانە هاتووین بەبڕوابوون بەوەی پەیوەندیی نێوان حزبەكان كلیلی پەیوەندیی حكوومی وپەرلەمانییە كۆمپانیا وەبەرهێنەرەكانیش پارێزەری ئەم پەیوەندییەن.

بارودۆخی ئێراق لای ئێمە گرنگترە

میرانی دووپاتیكردەوە بارودۆخی ئێراق لەلای كورد زۆر لەوە گرنگترە كە فڵانە كەس یان ئەوەی دیكە ببێتە سەرۆك وەزیران،لەوەڵامی پرسیارێكیشدا دەربارەی ئەوەی كورد پاڵپشتیی كێ دەكات میرانی نیشانیدا عەللاوی ومالیكی وجەعفەری وعەبدولمەهدی هەموویان دۆستی كوردن وقسە لەسەر كەسایەتیی ئەوان نییە بەڵكو پڕۆگرامی ئەوان بۆ خزمەتكردنی ئێراق وهەرێمی كوردستان گرنگترە.

وگوتی:ئێمە لەبەرژەوەندیی نەتەوەیی ونیشتیمانیی خۆمانەوە نزیكترین نەك فڵان كەسایەتی یان ئەوەی دیكە،ئێمە 2 ئیستیحقاقمان لەئێراقدا هەیە یەكەمیان نەتەوەیی ونیشتیمانی بەوپێیەی ئێمە نەتەوەی دووەمین لەئێراقدا واتا پێویستە پۆستێكی سیادی بۆكورد بێت لەگەڵ وەزارەتێكی سیادی،ئەگەرچی ئێستاش ئێراق لەسەر 3 تەوەردایە كوردوسوننەو شیعە بەڵام شیعەوسوننە هەردووكیان عەرەبن بۆیە داكۆكی لەسەر پۆستی سیادی دەكەین تانەبینە پلەدوو لەئێراقدا ئێستاش 5 وەزارەتی سیادی وپۆستی پارێزگاری بەنكی مەركەزیی ئێراق هەیە ومافی نەتەوەی دووەمە خاوەنی یەكێك بێت لەوپۆستانە، ئێمە لەسەردەمی سەددامیشدا بەشێوەیەك ئەو مافەمان هەبوو. دووەمیشیان ئیستیحقاقی هەڵبژاردنە وەكو هەر لیستێكی دیكەی ئێراقی بەژمارەی كورسییەكانی ئێمەوە پەیوە.

شتێكی ئاساییە داوای مافی نەتەوەیی خۆمان بكەین بەڵام لەڕووی مافی دوای هەڵبژاردن ناكرێ داوای مافی هاوشێوەی خاوەن 90 كورسی بكەین.

پەیوەندیی نێوان كوردی ئێراق وكوردی رووسیا

میرانی دووپاتیكردەوە گەلی كورد یەك پارچەیەو خاوەنی یەك زمان وكولتوورە وپەیوەندی لەنێوان كوردی ئێراق وكوردی ڕووسیاو كوردی كۆمارەكانی یەكێتیی سۆڤیێتی پێشوو هەیەو پەیوەستیی نەتەوەیی دەمانبەستێتەوە. هەروەها گوتی: بمانەوێ یان نا ئێمە یەك نەتەوەو گەلین زمان وكولتوور ومێژوومان یەكە، بەحوكمی جوگرافیای سیاسی وحوكمی سیستەمەكانی دیكە گەلی ئێمە لەنێوان دەوڵەتاندا دابەشكرا بەپێی ئەو ڕێككەوتن وسازشانەی لەسەر حیسابی گەلی كورد كران، ئەگەر ئەوەی دوێنێ بەئیستیعمار لەقەڵەمدەدرا كوردستانیان دابەشكرد،لەووڵاتی شیوعەتیشدا ناوچە كوردنشینەكان لەپارێزگاو وویلایەتەكان دابەشكران وەكو ئەوە وابێت ڕاست وچەپ لەدژی گەلی كورددا ڕێككەوتبن ئەوەش بارودۆخی ئێمەیە لەڕۆژهەڵاتی ناوەڕاست واتا ئەو حكوومەتانەی بەدیموكراسی وئەوانەی بەدواكەوتوو چەپڕەو لەقەڵەمدەدران بەهەمان شێواز مامەڵەیان لەگەڵ كورددا دەكرد،ئەوە قەدەری ئێمە بووە كەهیچ سەری بۆ دانانوێنین.

دوای ڕووخانی نازیزم گیانی نەتەوەیی بووژایەوەو ئەوكاتە حزبی ئێمە وەكو حزبێكی نەتەوەیی ودیموكراسی، ئەمڕۆش كورد لەپەیوەندیی نەتەوەیی وجیهانی تێدەگات بۆیە ئەوەی دوێنێ ڕوویدا ئەمڕۆ قبووڵی ناكات وكورد كوردیش گەلێكە ناتوانێ ڕەچەڵەكی خۆی لەیاد بكات بۆیە لەئەفغانستان وئۆزباكستان وقازاغستان وئێران وسووریا ولوبنان وئەرمەنستان وگورجستانیش بەزمانی خۆی قسەدەكات ولەیادی ناكات وپاڕێزگاریی لێدەكات. بەڵام ئێمە زۆر باش لەمامەڵەی ئاشتییانە لەگەل كۆمەڵگاكانی خۆمان تێدەگەین، لەزۆربەی ئەو ووڵاتانە چەندین كوردی داهێنەر هەبوون بەتایبەتی لەڕووسیا كەچەندین ژەنەڕاڵی كورد نازناوی پاڵەوانی نیشتیمانییان پێدرا لەسەردەمی شەڕی جیهانیی دووەم،ئێمەش بەوە دڵخۆش دەبین چونكە ئەوە دەبێتە سەرمایەی نەتەوەیی بۆ ئێمەو سەرمایەی نیشتیمانی بۆ ووڵاتەكەی. هەردوێنێ بوو لەگورجستان ویستیان فڕۆكەیەك بڕفێنن كوردێك فڕۆكەكەو سەرنشینەكانی ڕزگاركردو بوو بەپاڵەوان كەواتە ئێمە لەسەر ئەوە ڕاهاتووین ببین بە هاووڵاتیی باش تەنانەت ئەگەر ووڵاتەكانمان مامەڵەی باشیشیان لەگەڵدا نەكردین.

هەڵوێستی پارتی لەكشانەوەی ئەمەریكا لەئێراق

 

سكرتێری مەكتەبی سیاسی دووپاتیكردەوە لەسەر ئاستی نیشتیمانیدا پارتی لەگەڵ بەتاڵبوونی ووڵاتە لەهەر سەربازێكی بیانی بەڵام پێویستە بەشێوەیەكی واقیعی بیر لەومەسەلەیە بكرێتەوەوگوتی: دوای شەڕی دووەمی جیهان سوپای ئەمەریكا لەئەڵمانیا ودەوڵەتانی دیكە مایەوە تاپێكهێنانی سوپا،بەداەوە هێزی چەكداریی ئێراق تائێستا ناتوانن پارێزگاریی لەسنوور بكات ئەمەریكا سوپای كۆنی هەڵوەشاندەوە و ئەوەی بونیات نەنایەوە كەئێمە دەمانویست وجیاوازی لەبۆچوون لەنێوان حزبە سیاسییەكانی ئێراقدا هەیەو دەنگی پەیوەست بەدەوڵەتانی ئیقلیمی لەدیدی ئێراقییە ڕەسەنەكان جیاوازە بۆیە لەو ڕووەوە حزبی ئێمە سەددەرسەد ئێراقییە.

 بەبێ هەبوونی هێزێكی پارێزگار لەئاسایشی ناوخۆیی ودەرەكیی ئێراق جارێ ئەستەمە بەكشانەوەی ئەمەریكا لەئێراق قبووڵبكرێ،نیشتیمانپەروەری بەدەرچوونی ئەمەریكاییەكان تەواو نابێت وبەدەرنەچوونی ئەوانیش كێماسیی تیا ناكەوێت.

 

ڕۆڵی كورد دوای هەڵبژاردنی پەرلەمان

 فازڵ میرانی دووپاتیكردەوە كەمبوونی ژمارەی كورسییەكانی كورد لەئەنجامی یاسای هەڵبژاردن بوو كەلەدژی كورد دانراو هەریەك لەشیعەو سوننە دەنگیان بۆی دا وگوتی: لەدەنگی هەموو ئێراقییان كورد زیاتر لەدوو ملیۆن ونیو دەنگی هێنا و60 كورسیی لەپەرلەماندا بەركەوت،هەردوو لیستی عەللاوی ومالیكی بەنزیكەی 150 هەزار دەنگ لەپێشی كورد بوون كەچی ئەوان یەكیان 91 كورسی وئەوەی دیكەش 89 كورسیی بەدەستهێنا ، وەك ئاگاداریشن لەبەریتانیا پارتی دیموكراتی لیبراڵ لەگەڵ پارتی پارێزگاران بەمەرجی چاوخشاندنەوە بەیاسای هەڵبژاردن ڕێككەوت ، ئێمەش داوای گۆڕینی یاسای هەڵبژاردن لەهاوپەیمانانمان دەكەین.

 

 

 
چاپکردن   Share گه‌ڕانه‌وه‌