2010-05-26

سەفەر كەریم هاواری

 

شۆڕشی گوڵان درێژەپێدەرو تەواوكەری شۆڕشی مەزنی ئەیلوولە، دایكان و ئافرەتان بەگشتی لە هەردوو شۆڕشدا ڕۆڵی بەرچاویان بینی، بێگومان ئەمەش بە قسە نا، بەڵكو بەكردەوە شان بە شانی برا پێشمەرگەكانیان پشتگیریان لەبزووتنەوەی ڕزگاریخوازی نەتەوەی كورد كرد، بەتایبەت لە باشووری كوردستانداو ئەنجامەكەش خۆی لەئازادی باشووردا دەبینێتەوە كە بۆ ئێمەی كورد دەسكەوتێكی كەم نییە، بۆیە دەبێت لەكات و بۆنە نەتەوەییەكاندا بەپێی دەرفەت ئاوڕ لە وردكاریەكان و تایبەتمەندیەكانی شۆڕش بدەینەوە..

 

بۆ یادی شۆڕشی گوڵانی پێشكەوتنخواز چەمكی (دایكی كوردستان) بەسەردەكەینەوە، كە لەوانەیە بەهۆی ئاڵۆزی ژیانی ئەم سەردەمەوە، زۆرێك لە هاووڵاتیان و برا پێشمەرگەكانمان ئەو زاراوەیان لەبیر كردبێت، بۆیە لەم ڕۆژە پڕ سەروەردیەدا دەمانەوێت هەم ئەو زاراوە وەبیر جەماوەر و پێشمەرگە بهێنینەوە، هەمیش كەمێك لە خەبات و گیانی لە خۆبوردوویی ئەو ئافرەت و دایكانە باس بكەین كە لە شۆڕشی گوڵاندا ڕۆڵی مەردانەیان بینی...

 

زاراوەی (دایكی كوردستان) بەو ئافرەتانە دەوترا كەوەك دایكێك خزمەتی پێشمەرگەیان دەكرد، لە گوندەكانی كوردستاندا ناو و ناوبانگیان لەناو هەموو مەفرەزەكاندا بڵاو دەبوویەوە، دایكی میهرەبانی كوردستان دایكی هەموو پێشمەرگەیەك بوو بەبێ جیاوازی...

 

 پێشمەرگە كە لە جەنگێك یان جەولەیەك دەگەڕاوە هیلاك و ماندوو.. پێش ئەوەی بگەڕێتەوە ناو بارەگاكەی، دەبوایا سەری لە ماڵی دایكی كوردستان بدابا چونكە هەر ئەو دایكە بوو وەك دایكی خۆی بەپیرییەوە دەچوو و دەستی لە ملی دەكردوو، بەخێرهاتنەوەی دەكردوو، هیلاك و ماندووبوونی دەردەكردوو، دۆ و كەرەو پیازی تەڕی بەنانی هەورامانەوە بۆ دادەناو، بەگفتو لوتفێكی خۆشەوە خزمەتی دەكرد، تەنەكە ڕەشەكەی بۆ دەخستە سەر ئاگرو پێی دەوت: هەردوای نان و چاخواردنەوە یەكسەر بڕۆ بۆ حەمام و پاك خۆت بشۆ، پێشمەرگەكە دەیوت: دایە حەز ناكەم ئەوەندە زەحمەتت بدەم. كوڕم! چۆن دەهێڵم بەو چلك و عارەقەوە لە ماڵم بچیتە دەرەوە...

 

 ئەگەر پێشمەرگە دایكی دڵسۆزی ئاوای نەبوایا، بێگومان نەیدەتوانی لەباشووردا بە ئاواتەكانی بگات، ئەم جۆرە دایكانە باش هەستیان بەبەرپرسیاریەتی دەكرد بەرامبەر بە شۆڕش و نەتەوەكەیان، دەشیانزانی ئەم بێشمەرگانە پارێزگاری لەمافی گەلێكی ستەم لێكراو دەكەن، بۆیە بە هەموو جۆرێك پشتگیریان لەشۆڕش و پێشمەرگە دەكرد.

 

شەو تا بەیانی لە وەرزە سەختەكانی زستاندا ئەم دایكانە نەدەخەوتن جل و بەرگی پیرۆزی پێشمەرگەیان وشك دەكردەوە بۆ ئەوەی بۆ سبەینێ لەبەری بكەنەوە...

 

كاتێك پێشمەرگەكان ڕوویان لەماڵی وادەكرد هەرلە دەرگاوە دەیانوت دایە. دایە. دایەی میهرەبانیش بە جوانترین وشەو دەربڕینی پڕ لە هەستی سۆزو دایكایەتی دەیوت گیان...گیان، فەرموو دایە لەماڵە...

 

زۆرجار مرۆڤ لەماڵی خۆیدا ئەوەندە ئازاد نەبوو، بەڵام پێشمەرگەكان بەجۆرێك لەو ماڵانە دا ئازادبوون كە خەڵكی نەشارەزا وای دەزانی كە ئەودایكی ڕاستەقینەی پێشمەرگەكەیە.

 

هەڤاڵێكی شۆڕشی گوڵان بۆی گێڕامەوە: دەیوت جارێكیان پاش شەڕێكی پارتیزانی لەشارەزووردا، لە شەوێكی ساردی وشكی زستاندا، هەموو گیانمان بوو بووە قوڕ، چەندین جار دەكەوتینە ناو زۆنگاوو زەلكاوەكان، هەرچۆنێ بوو كاتژمێر سێی شەو خۆمان گەیاندە ماڵێك، كە بەمانای وشە(دایكی كوردستان) بوو دایكی ئەوماڵە، كەپیاوەكە دەرگای لێ كردینەوە، وای زانی لە ڕەگەزی مرۆڤ نین، بەڵام ژنەكە یەكسەر دەنگی ناسین و وتی: دایكتان بمرێ! ئەوە بۆ واتان لێ هاتووە،؟ ئەو شەوە خزمەتێكی وای كردین هەموو ماندوو بوون و هیلاكیەكەمان بەسانایی دەرچوو.

 

هەڤاڵەكە وتی: بەڵام ئەمڕۆ من خاوەنی دووژنم دووسێ ئۆتۆمبێل و خانووم هەیە، هەموو شتێكم بۆ خێزانەكانم دابین كردووە، بەڵام ئەگەر شەوێك ئاوا بگەڕێمەوە بۆ ماڵەوە بڕوا ناكەم هیچكام لە ژنەكانم وەرم گرنەوە، بەڵام ئەو دایكە میهرەبانە لەو شەوە ساردەدا، جلەكانی بۆ شۆردین، جلی پیاوەكەی هێنا لەبەرمان كرد، پاشان لە ماڵە دراوسێكانی جلی پیاوانەو پێخەفی پێویستی بۆ دابین كردین، نەخزمی بووین، نە خەڵكی ناوچەكە، تەنها ئەوەندەی دەزانی كە ئێمە پێشمەرگەین...

 

با بەهەموومانەوە ڕۆڵی ئافرەتان و دایكی كوردستان لە یادنەكەین...

 

 
چاپکردن   Share گه‌ڕانه‌وه‌