ROJNAMEY XEBAT 2010-06-30
Serokî Kurdistan Pêşwazî Kird Le Wezîrî Dewletî Turkiya Bo Karubarî Bazirganî Derekî û Şandêkî Yawerî.

Berêz Mes'ûd Barzanî Serokî Herêmî Kurdistan le Selaheddîn pêşwazî kird le berêz Zefer Çaleyan Wezîrî Dewletî Turkiya bo karubarî bazirganî derekî û şandêkî yawerî.

Le danîştinêkda ke berêzan Sînan Çelebî Wezîrî Bazirganî û Pîşesazî Herêmî Kurdistan û Aydin Silcin Kunsulî Turkiya le Herêmî Kurdistan û jimareyek le berpirsan amadey bûn, Wezîrî Dewletî Turkiya bo bazirganî derekî wêray xoşhalî derbirîn bew serdaney bo Herêmî Kurdistan silawî her yek le Serok Komar û Serok Wezîranî Turkiyay be Serok Barzanî geyand û amajey bewe kird ke wilatekey xwaziyare baştirîn peywendî le gel Herêmî Kurdistanda bibestê û jimareyekî zorî weberhênî û xawenkar û kompaniyay Turkî bêne Kurdistan û karî tiya biken û em seqamgîriyey Herêmî Kurdistanîşî be handerêkî serekî dana bo encamdanî karî weberhênan û ptewkirdin û alugorkirdinî bazirganî le herêm da û hîway xwast ke em serdane serdanêkî berhemhên bêt û amajey be serdane mêjûyekey em duwayiyey Serok Barzanîşî kird bo Turkiya û raygeyand ke hatinî Serok Barzanî bo Turkiya bayex û giringî xoy hebû, lew serdane da cext le ser hawkarî aborî nêwan Herêmî Kurdistan û Turkiya kirayewe.

Be taybetî le rakêşanî weberhêne Turkiyekan bo karkirdin le biwarekanî wize û newt le gel projekanî aborî û biniyatinanî telar û takîdîşî lewe kirdewe ke bazirganî kilîlî siyasete û baştirkirdinî peywendiyekanî nêwan her dûlaş debine hoy berew pêşewe birdinî aborî Herêm û Turkiya , Herêmî Kurdistan dergayeke hem bo Turkiya û hemîş bo Iraq , boye niyaziman waye nawçeyekî azad le ser sînorî nêwan Herêm û Turkiya dirust bikeyn û çend banqêkîş biryariyandawe liqî xoyan le Herêm bikenewe lewane Banqî Kar ke gewretirîn banqe le Turkiya eme sereray firawankirdinî çalakiyekanî hêlî asmanî Turkiya.

Serok Barzanî , wêray be xêrhênanî Wezîrî Dewletî Turkiya bo Bazirganî Derekî û şande yawerekey raygeyand ke Turkiya wilatêkî doste û pêgey aborî xoy heye le nawçeke da, boye xwaziyarîn peywendiyekaniman le gel Turkiya da berewe pêştir bibeyn , be taybetî jîngey karkirdin û weberhênan le Herêm guncawe û be bayexeweş denrwanîne firawankirdinî aste ciyaciyakanî peywendî nêwan herdûla û dawaşî le Wezîrî Dewletî Turkiya kird silaw û rêzî bigeyenête her yek le Serok Komar û Serok Wezîran û Wezîrî Derewe û destxoşîşî le siyasetî kiranewey em duwayiyey Turkiya kird û takîdî le ser bayexî pêkewe jiyanî birayaney nêwan Turk û Kurd kirdewe ke hetmen le berjewendî nawçekedaye.

Eme û le tewerêkî dîkey danîştinekeda , Serok Barzanî tîşkî xiste ser duwa peresendinekanî rewşî siyasî Iraq û ew hewlaney ke dedrên bo pêkhênanî hikûmetî nuwê be labirdinî tegerekanî berdem prosey siyasî û bernamey Herêmî Kurdistan bo beşdarîkirdin le pêkhênanî ew hikûmete û lem ruwewe berêziyan raygeyand ke Herêm hîç hêlêkî sûrî le ser hîç kesayetî û layenêk danenawe û giring bernamey hikûmetî nuwey Iraqe ke debê rûn û aşkira bêt û guzarîştîş le tewawî pêkhatekanî Iraq bikat, eme sereray pabendibûn be destûr û şeraketî rasteqîne.

 
chapkrdn   Share GERANEWE‌